Шалбуз дагъдин ценерикай хкатзавай къайи булахрин яд хъвазвай Сулейман-Стальский райондин чIехи хуьрерикай сад тир Уллу Гъетягъар композиторралди, шаирралди, вини дережадин къуллугъчийралди, духтурралди тафаватлу я. Абурун мешреблу крарилай алай вахтунда жегьилри чешне къачузва.
Уллу Гъетягърин хуьре яшамиш жезвай Ватандин ЧIехи дяведин иштиракчи Агъабалаев Алимерданан хизандикай тир, алай вахтунда Герейханован хуьруьн 1-мектебда физкультурадин муаллим яз кIвалахзавай Агъабалаев Ханбаладикай ихтилат ийиз кIанзава.
Ватандин ЧIехи дяве башламиш хьайила, Агъабалаев Алимердан сифтебурун жергеда аваз гуьгьуьллудаказ фронтдиз фенай. Дяведилай гуьгъуьниз инвалид яз хтай ада хуьре налогар кIватIиз ва колхоздани кIвалахиз хьана. ЧIехи хизанни арадал гъана.
Уьмуьрдин юлдаш Хадужата Алимерданаз 5 хвани 1 руш багъишна. ЧIехи хва Зияудин, военный яз, пенсиядиз фенва. Агъабала, кьилин чирвилер къачуна, са шумуд йисуз хуьруьн «Айдинбековский» совхоздин директор, алай вахтунда хуьруьн школада муаллим, Ханбала Герейханован 1 – хуьруьн школада муаллим, Алибалани, Фикрет юкьван технический образование авай пешекарар я. Вах Жавгьанатани вичин пешедай кIвалахзава.
Вири веледар эвленмишна, чпин пешейрай кIвалахзава. Са шумуд хтулди, птулди бубади къалурай камаллу рехъ давамарзава. Агъабалаев Ханбала 1947-йисан 9-сентябрдиз Уллу Гъетягърин хуьре дидедиз хьана. 1964-йисуз 8-класс куьтягьна, ам Огни шегьердин ПТУ-диз кIелиз фена. 1966-йисуз ам Советрин Армиядин жергейриз фена. Са йисалай частунин командирдилай диде-бубадин тIварцIихъ чухсагъулдин чарни хтанай.
1969-йисуз, армиядай хтайла, ам Буйнакскдин педагогвилин училищедик экечIна. Анаг хъсан къиметар аваз акьалтIарай жегьилдикай ЦIийихуьруьн школада муаллим хьана. Ина ада 1988-йисалди кIвалахна. 1986-йисуз заочнидаказ Дагъустандин государстводин педагогвилин институтдин математикадин факультетдик экечIна. 1988-йисуз Ханбала Агъабалаев Герейханован 1-школадиз физкультурадин муаллим яз хтана, гьа са вахтунда районода физкультурадин рекьяй методистни хьана.
1988-2016-йисара нянин школадин заведующий яз кIвалахна. ЦIийи хуьруьн ва Герейханован школайра физкультурадин муаллим тир йисара райондин школайрин арада кьиле фейи акъажунра ада тербия, чирвилер гайи цIудралди аялри виниз тир чкаяр кьуна. ИкI, 2013-йисуз райондин школьникрин арада кьиле фейи Олимпиадада приздин чкаяр кьур аялриз райондин образованидин управленидин начальник Д.Асланова грамотаяр гана. 2014-йисуз райондин школьникрин физкультурадай кьиле фейи олимпиадада гъалибвал къачунай (II класс) РУО-дин начальник Д.Асланован къул алаз грамота гана. Райондин 59-спартакиадада физкультурадин рекьяй аялар хъсандиз гьазурунайни ам грамотадиз лайихлу хьана.
Х.Агъабалаева школада физкультурадин тарс гайи цIудралди аялри спортшколадани аквадай хьтин чкаяр кьазва.
Вич кьилин чирвилер авай математик-программист яз, адан рикI физкультурадал гзаф ала. Ханбала Алимердановичан хизанда 2 хвани 2 руш ава. КIвалах Герейханован школада ийизватIани, ам Кьасумхуьрел яшамиш жезва. Адаз хайи Гъетягъа, Кьасумхуьрел, Герейханован хуьрени, школадани еке гьуьрмет ава. Педагогикадин рекье 47 йисуз зегьмет чIугвазвай адахъ къуй чандин сагъвал хьурай.
Гъетягъ Вадим
