15-17-сентябрдиз Махачкъаладин Р.Гьамзатован тIварунихъ галай Милли библиотекадин дараматда республикадин мулкунал 6 лагьай сеферда тешкилнавай, маса уьлквейрин карханайрин иштираквални авай “Мебель- Интерьер-Дизайн” махсус выставка-ярмарка кьиле фида.
Идакай арбе юкъуз “Дагъустандин правда” газетдин редакцияда журналистрихъ галаз хьайи гуьруьшдал республикадин выставкайринни маркетингдин “Дагъустан-ЭКСПО” центрадин директор Мегьамед Саругъланова хабар гана. Пресс-конференцияда РД-дин алишверишдинни промышленный палатадин (ТПП) вице-президент Александр Шевченкодини иштиракна.
“Эхиримжи са шумуд йисуз, уьлкведа арадал атанвай кризис себеб яз, мебелдин хилени бязи дегишвилер хьанва. Кьилди къачуртIа, республикадин карханайри гьазурзавай мебелдин машгьурвал артух хьанва. Идан себеб, гьелбетда, къиметар ужуз хьунихъ галазни алакъалу я, амма мад са себеб ам я хьи, чи устIаррин гъиликай хкатзавай шейэрин ери неинки усал туш, гьакIни са кьадардин винизни я. Амма муьштерийриз и кар чпин вилералди акун, республикадин мебелдин карханайри базарда инанмиш чка кьун патал вахт-вахтунда выставкаяр тухун чарасуз я”, — малумарна Мегьамед Саругъланова.
Малум хьайивал, республикадин меркез пуд йикъан вахтунда Кеферпатан Кавказдин мебелдин бизнесдин центрадиз элкъведайвал я. Ина Москвадай, Санкт-Петербургдай, Краснодарский крайдай, Адыгея, Карачаево-Черкесия, Кеферпатан Осетия-Алания, Чечен республикайрай, Ростовский, Ульяновский ва Московский областрай, гьакIни Белоруссиядай, Китайдай, Италиядай тир мебелдин виридалайни хъсан чешнейриз килигиз, маса къачуз жеда.
Мебелдин выставкада иштиракун адет хьанвай карханайрихъ галаз санал, алай йисуз мярекатда цIийи компанийрини иштиракда. Абурун арадай яз агъадихъ галай карханайрин тIварар кьаз жеда: “Ангажемент”, “Гарант”, “Дубрава”, “Дагъустан”, “Европадай тир мебель”, “Русский ламинат”, “Хан-тах”, “Премьер”, “Аванти”, “Мебельторг”, “BELLONA”, “Majeko”, “Юмаком”, “Кроношпан”, Эликор”, “Хранвай мебель”, “Белоруссиядин мебель”, “Престиж” ва икI мад.
“Мебель-2017” выставка жуьреба-жуьре паярикай ибарат жеда. ИкI, яшайишда адет яз ишлемишдайдалай гъейри ина общественный чкаяр патал, мебель гьазурун патал ишлемишдай шейэр, фурнитура, парча, тумаж, кафеяр, ресторанар, офисар, мугьманханаяр патал, бахчада эцигдай мебель жеда. Инай кIвалин къенепад тамамдаказ туькIуьрун, безетмишун патал лазим тир пердеяр, халичаяр, цлакай куьрсардай шикилар, кIвалер чIагуруниз талукь маса шейэр жагъида.
Мегьамед Саругъланова къейд авурвал, республикада йисалай-суз яшайишдин кIвалер, дараматар гзаф эцигзавай девирда и кIвалер безетмишиз куьмек гун патал мебелдин базардин сергьятар гегьеншарунихъ еке метлеб ава.
Александр Шевченкоди къейд авурвал, алай йисуз Белоруссиядин мебелдин хиле кIвалахзавай карчийри Дагъустандихъ галаз алакъаяр мягькемаруниз кьетIен фикир гуз башламишнава. “Чи республика, маса регионрив гекъигайла, виридалайни екеди я. Гьаниз килигна, выставкайра иштиракзавай са кьадар карханайри гуьгъуьнлай, адет хьанвайвал, республикада чпин векилханаяр ачухзава, абуруз Дагъустанда чпин бизнес тешкилун хийирлу яз аквазва”, — малумарна ада.
Жасмина Саидова
