И йикъара чун Сулейман-Стальский райондин хуьруьн майишатдин ва суьрсетдин управленидин начальник Мегьамедзагьид Бабаевахъ галаз гуьруьшмиш хьана, чи арада магьсулдарвилин хел вилик тухуникай ихтилат кьиле фена.
— Алай йисан бегьер патал райондин хуьруьн майишатдин карханайри, лежбервилинни фермервилин майишатри ва арендаторри 2200 гектарда магьсулар цанвай, — лагьана М.Бабаева. — Идакай 160 гектар нехв, 140 гектар гатфарин мух, амайди зулун магьсулар цанвай майданар тир. Анрай 5600 тонндилай виниз техил вахчуна, яни гьар са гектардай 24,5 центнер.
Къведай йисан бегьер патал районда 1900 гектарда зулун магьсулар цун планламишнавай. И кар патал вахтундамаз чил, цадай тум гьазурна. Тумунин 80 процент чкадал гьазурна, 200 тонн Ставропольский крайдай маса къачуна.
М.Бабаева лагьайвал, райондин карханайри, КФХ-ри ва арендаторри 10-октябрдалди 1950 гектарда тумар чилик кутуна.
Техилар гзаф майданра цанвайбурук Курхуьруьн (231 гектар), Вини СтIалрин (168 гектар), Испикрин (234 гектар), Агъа СтIалрин (200 гектар), Кьулан СтIалрин (242 гектар), Герейханован (92 гектар) хуьрерин майишатар акатзава.
Гекъигайла техилар гзаф майданра цанвай хуьруьн майишатдин карханаяр, лежбервилинни фермервилин майишатарни ава. Ихьтинбурукай яз, завай “Паласа” (160 гектар), “Сайтар” (180 гектар), “Зардиян” (100 гектар), “Горец” (200 гектар) ООО-рин, “Новый путь” СПК-дин (42 гектар), “Кадиров В.К.” (70 гектар), “Казиахмедов К.” (25 гектар), “Гайвазов Р.М.” (60 гектар) КФХ-рин тIварар кьаз жеда.
— Шадвалдай кар ам я хьи, хуьруьн майишатдин карханайрихъ, лежбервилинни фермервилин майишатрихъ галаз санал, эхиримжи вахтара районда магьсулдарвал вилик тухуник лайихлу пай кутазвай арендаторрин кьадарни артух жезва, — давамарзава ихтилат М.Бабаева. — И жигьетдай Курхуьруьн арендаторар чешне яз къалуриз кIанзава. Ина магьсулдарвилел машгъул жезвай кархана ва я лежбервилин майишат авач, арендаторри гьар йисуз 200 гектардилай виниз майданра техилар цазва.
Курхуьрел арендаторар тир Вилимет, Нарим ва Тарлан Саругълановри гьар сада — 25 гектарда, Шагьимерден Мегьамедова — 30, Сефербег Шайдаева — 55, Руслан Гьажалиева — 36, Мурад Бабаева — 35, санлай хуьруьн арендаторри 231 гектарда зулун магьсулар цанва.
Магьсулдарвал вилик тухуник пай кутазвай арендаторар маса хуьрерани ава. Ихьтинбурукай яз, заз Гь.Велиеван (45 гектар, Герейханован хуьр), М.Алхасован (30 гектар, КIварчагъ), И.Гьамзатован, Г.Насрулаеван (гьарда — 60 гектарда, Агъа СтIал), Гь.Гьажиисмаилован (10 гектар, Эминхуьр), У.Агьмедован (6 гектар, ЦIийи Макьар) тIварар кьаз кIанзава.
М.Бабаева чаз лагьайвал, къведай йисан гатфаризни 300 гектарда къуьл, мух ва нехв цан хъийида.
Магьсулдарвиликай рахадайла, къейд ийиз кIанзава хьи, “Куьре-Агро” МТС кьве комбайн ва герек маса техника къачунин къайгъуда ава.
Гележегда, гуьнепатан чIурухъан чилер ишлемиш хъувуналди, районда магьсулар цазвай майданрин кьадар артухардайвал я — 2500-3000 гектардив агакьарда.
Хазран Кьасумов
