Мукьвара Кострома шегьерда азаддиз кьуршахар кьунай “Костромской спорт, туризм и отдых” газетдин призар патал жаванрин арада Вирироссиядин IХ турнир кьиле фена. Ам Россиядин спортдин женгерин Федерацияди, Костромадин физический культурадин ва спортдин комитетди, областдин спорт вилик тухунин фондуни, тIвар кьур газетдин редакцияди, областдин журналистрин Союзди тешкилнавайди тир. Ана Кострома, Иваново, Ярославль, Санкт-Петербург, Москва ва маса шегьеррай, Россиядин субъектрай, абурукай яз Дагъустан Республикадай атанвай 100-лай виниз спортсменри иштиракна.
Эминхуьруьн ДЮСШ-дин тербиячи (тренер Абдулнасир Мегьамедкеримов) Адам Гьамзатова и турнирда 58 килограммдин заланвал авайбурун арада 1-чка кьуна. Ам медалдиз, 1-дережадин дипломдиз ва Кубокдиз лайихлу хьана.
— Костромада кьуршахар кьунай тухузвай Вирироссиядин турнирда Сулейман-Стальский райондин спортсменри иштиракиз им 3-йис я, — лугьузва Къазахстан Республикадин лайихлу тренер, спортдин мастер Абдулнасир Мегьамедкеримова. — ИкI, шаз ана иштиракай 4 жавандикай пуда приздин чкаяр кьунай. Алай йисуз турнирда чи са спортсменди иштиракна. Ада вичиз авур ихтибар кьилизни акъудна — гъалибвал къачуна.
Чи мухбир
