Махачкъаладин администрациядин цIийи кьил анжах шегьердин мэрдин къуллугъдилай алуднавай Муса Мусаеваз талукь суддин къарар къуватда гьатайдалай гуьгъуьниз тестикьарда, хабар гана ТАСС-диз шегьердин администрациядин аппаратдин векилди.
Чилерин участокар чара ийидайла, къуллугъдин рекьяй вичин векилвилин ихтиярар лазим тирдалай виниз хкажунай шак финай М.Мусаеваз талукь уголовный дело 18-январдиз къарагъарнай, гуьгъуьнлай ам алай къуллугъдилай алуднай. Махачкъала шегьердин Советский райондин судди 15-октябрдиз адаз кьуд йисан умуми режимдин дустагъ атIана. Адан тереф хуьзвайди суддин къарардилай рази хьанач.
“М.Мусаеваз талукь яз суддин къарар къуватда гьатнавач, гьикI лагьайтIа, суддин къарардилай адан тереф хуьзвайди рази туш. Суддин къарар закондалди къуватда гьатайдалай гуьгъуьниз суддай чар хкведа, шегьердин собраниди и чар кьабулда, везифаяр вахтунилай вилик акъвазарунин гьакъиндай месэла гьялда ва къуллугъдин азад хьанвай чка кьун патал конкурс малумарда. Ахпа комиссияди шегьердин собранидиз кандидатура теклифда, шегьердин собранидини, сесер гуналди, кандидатура тестикьарда!, — лагьана агентстводин суьгьбетчиди.
Шегьердин кьилин везифаяр вахтуналди тамамарай Абусупьян Гьасанов кьурдалай гуьгъуьниз исятда шегьердин кьилин везифаяр вахтуналди Махачкъаладин мэрдин заместитель Мурад Алиева тамамарзава. А.Гьасанова 22-январдилай, Махачкъаладин мэр Муса Мусаев кьурдалай гуьгъуьниз, шегьердин кьилин везифаяр тамамарнай.
Виликдай Россиядин ФСБ-дин Дагъустанда авай управлениди, Махачкъаладин мэрдин везифаяр вахтуналди тамамарзавайди тир Абусупьян Гьасановалай къуллугъдин рекьяй вичин ихтиярар лазим тирдалай виниз хкажунай уголовный дело къарагъарнавайдан, ам кьунвайдан гьакъиндай малумарнай. Силисдин делилрал асаслу яз, адан законсуз гьерекатри рекьеринни эцигунрин кIвалахар тамамардай аукцион кьиле тухудай вахтунда государстводин интересриз хейлин зиян гана. Алай вахтунда А.Гьасановаз кIвалин дустагъ атIанва.
Дагъустандин Кьил Владимир Васильева виликрай малумарнай хьи, исятда администрациядин кьилин къуллугъдал цIийи кас жагъурзава, Махачкъаладин мэрдин къуллугъдик “фул акатнава”, “адаз гьалар пайгарзавай меркезрикай садан мэрдин сад лагьай заместитель и къуллугъдал акуна кIанзава, вични ам дагъустанви жен”.
«Лезги газет»
