Алай вахтунда Ахцегь райондин хуьруьн майишатдин хиле хейлин КФХ-яр ва ЛПХ-яр кардик ква. Зегьметчийри, алатай йисуз хьиз, цIини салан майвайрин ва емишрин хъсан бегьерар кIватI хъийизва. Хуьруьн майишатдин управленидин набататчивилин отделдин начальник Ханлар Рамазанова къейд авурвал, районда салан майвайри 750 гектардин майданар кьунвай ва 27375 тонн салан майваяр кIватI хъувуна. Бегьерлувили са гектардай 365 центнер тешкилна. Картуфрин бегьерди 12800 тонн тешкилна, яни гьар са  гектардай — 227 центнер.

ЦIи районда 250 гектардин багъларай пIинийрин, хутарин, шефтелрин, машмашрин, кIерецрин, ичерин, чуьхверрин ва маса емишрин 1295 тонн бегьер вахчуна.

Райондин бейкар хейлин агьалийрин дуланажагъ сала, багъда гьасилзавай суьрсетдилай къвезвай къазанжидилай аслу я. Виликдай абуруз гьасилзавай артухан суьрсет Россиядин ва Дагъустандин базарра маса гудай мумкинвал авай. Гьайиф хьи, гила инсанар и жигьетдай четинвилера гьатзава. Идалайни гъейри, къиметарни ужузбур я. Чна райондин хуьруьн майишатдин управленидин руководстводи арадал атанвай гьалар алудунихъ элкъуьрнавай серенжемар кьабулдайдак умуд кутазва.

Рагьидин Эминов