Гьеле Хасавюрт райондин Къурушрин хуьруьн Я.Аскандарован тIварунихъ галай 2-нумрадин школада кIелзавай йисара ада мукьвал-мукьвал гьам райондин, гьамни республикадин дережада аваз кьиле тухузвай олимпиадайра кIвенкIвечи чкаяр кьазвай. Ажайиб кьатIунар, чирвилер, зигьин авай и аялдин алакьунрални алахъунрал адаз тарсар гузвай муаллимри, адан чирхчирри гьамиша гьейранвалзавай.
Нажибулла квелди тафаватлу тир лагьайтIа, ада жуьреба-жуьре предметрай вичин чирвилер артухариз алахъзавай, кIеви къаст аваз кIелзавай жегьилди чIугвазвай зегьметди бегьерарни гузвай.
ИкI, ада пуд йисуз галаз-галаз ингилис чIалай кьиле фейи республикадин олимпиадада 3-чкаяр, математикадай 11-классра кIелзавай аялрин арада кьиле фейи республикадин олимпиадада 3-чка, гьакIни районда биологиядай кьиле фейи олимпиадайра пуд йисуз (9-11-классра) галаз-галаз 1-чкаяр кьунай. Вири предметрай вадар аваз кIелай Нажибуллади мектеб къизилдин медалдалди акьалтIарна.
Вичин рикI алай пеше ада гьеле мектебдин партадихъ галамаз хкянавай: инсанрин сагъламвилин къаравулда акъвазун. Ихьтин къаст авай жегьил хуьруьн мектеб акьалтIарай 2012-йисуз кьисметди уьлкведин меркездиз акъудна. Адакай Н.И.Пирогован тIварунихъ галай Россиядин милли ахтармишунрин медицинадин университетдин студент хьана.
Вузда кIелиз эгечIай сифте варцарилай гатIунна Н.Вердиханован тафаватлувал санал кIелзавай юлдашри, адаз тарс гузвай преподавателрини кьатIуз башламишна. Дуланажагъдин жигьетдай гьалтзавай вири четинвилериз, кIелунрин хиле расалмиш жезвай хейлин муракабвилериз дурум гана, сифтегьан курс агалкьунралди куьтягьай Нажибулладиз 2-курсунилай гатIунна гьукуматдин виниз тир стипендия тайинарна (къейд авун лазим я, и стипендия ада гилани къачузва).
Н.Вердиханован тIвар вичи кIелзавай вузда йисалай-суз сейли жезва. Чирвилерин рекье къазанмишзавай агалкьунрихъ галаз санал бажарагълу жегьилди вичи кIелзавай вуздин общественный уьмуьрдани активдаказ иштиракзава, ана ада вич алакьунар авай тешкилатчи хьизни раиж авунва. Лезги хцин алахъунар себеб яз ада кIелзавай вузда хирургиядин устадвилин кружок кардик акатнава. ГьакIни Нажибуллади гьар йисуз вузда студентрин арада хирургиядай теориядин олимпиадаярни тешкилзава.
Терапиядин ва хирургиядин хилерай хейлин конференцийрин иштиракчи тир Н.Вердиханов кIелунин 2015-2016-йисуз кьиле тухвай илимдин фестивалдин оргкомитетдин член тир, гьакIни адакай кIелунин 2015-2016 ва 2016-2017-йисара студентринни жегьил алимрин международный Пироговский конференциядин оргкомитетдин членни хьана.
Университетда вири вадар аваз кIелзавай бажарагълу лезги хци мукьвал-мукьвал гьам вуздин, гьамни адалай къецепата кьиле тухузвай “чирвилерин акъажунрин” хейлин серенжемра иштиракзава ва кIвенкIвечи чкаярни кьазва. ИкI, кIелунин 2015-2016-йисуз ада терапиядай вуздин къенепатан “Жаван Клиницист” олимпиадада 3-чка къазанмишнай ва терапиядай са шумуд вуздин арада кьиле фейи “Жаван Клиницист” олимпиададани ам финалдиз акъатнай. Гьа и йисуз ам Москвада “Сухожильный шов” ва “Сосудистый шов” конкурсра хирургиядай М.И.Перельманан тIварунихъ галай Вирироссиядин тежрибадин олимпиададин иштиракчи хьанай. Эхиримжи кьве йисуз галаз-галаз ада хирургиядай теоретический олимпиадайра 1-чкаяр кьуна.
Нажибала Вердиханов неинки вичи чирвилер къачузвай вузда, гьакIни уьлкведин меркезда кIелзавай дагъустанвийрин арадани агалкьунралди кIелзвай студентрикай сад я. Алай йисан апрелдин вацра РД-дин Кьил Рамазан Абдулатипов Москвадин вузра вири вадралди кIелзавай дагъустанви студентрихъ галаз гуьруьшмиш хьанай. Абурун арада чи дамахлу хва, и макъаладин игитни (шикилда) авай. А чIавуз Р.Абдулатипова Нажибулладив чIагурнавай рамкада аваз РД-дин Кьилин стипендиядин гьакъиндай документ (“Распоряжение”) вахканай. А мярекатдал малум хьайивал, алай вахтунда Москва ва Подмосковьедин шегьеррин кьилин вузрани илимдинни ахтармишунардай институтра, санлай къачурла, саки 4500-дав агакьна дагъустанви студентри чирвилер къачузва ва абурукай 147 кас вири вадар аваз кIелзавайбур я. Абурукай сад Нажибулла хьун чи кьилин винизвал тушни бес?!
Макъала гьазурдайла за Нажибулладихъ галаз авур суьгьбетдай малум хьайивал, адахъ гележегда рикIин ва дамаррин хирург жедай ният ава.
— За хирургиядин техникадай чирвилер къачузва ва Склифосовскийдин тIварунихъ галай Тади куьмекдин институтда дежурствояр кьиле тухуналди, хирургиядин рекьяй жувахъ авай алакьунар артухарзава. Алай вахтунда за гьа и институда кIвалахал акъвазун патал документар вуганва. 5-курсунин гатун сессия за вири вадралди вахканва. Къведай 6-курс зун паталди лап кьетIенди жеда, чирвилер къачунихъ галаз санал за официальнидаказ кIвалахни ийида, — лугьузва и макъаладин кьилин игитди.
Са шакни алачиз, Нажибулла хьтин акьуллу, савадлу рухваяр неинки абурун багърийрин, гьакIни вири хуьруьнвийрин, ватанэгьлийрин кьилин винизвал я. Нажибулладин эсилдикай рахайтIа, адан буба Исмаил Шагьназарович хуьруьн участковый больницадин терапевт я, диде Динара Агъарагьимовна — хуьруьн мектебда тарсар гузвай муаллим. Аферин акьуллу веледар тербияламишзавай диде-бубайриз!
Садазни сир туш, медицинадин хиле къазанмишнавай агалкьунралди чпин тIварар неинки лезги халкьдин арада, гьатта вири республикадиз машгьур хьанвай ксар къурушвийрин арада садни кьвед авач. Абурун арадай яз чавай дамахдивди медицинадин илимрин кандидат Везиров Микьдад Жамаловичан, медицинадин илимрин доктор, академик Рашид Сейфиевич Гьажиеван, машгьур общественный деятель, медицинадин илимрин кандидат Нариман Салманович Рамазанован ва масабурун тIварар кьаз жеда. Чна Нажибуллади и баркаллу ксарин гелеваз лайихлу камар къачудайдак еке умудар кутазва. Адан алахъунри гъизвай цIирери чаз гьахьтин умудар кутадай бинеяр гунни ийизва. Къуй ви рикIевай экуь мурадар кьилиз акъатрай, вахъ кIелунин рекье мадни еке агалкьунар хьурай, гьуьрметлу Нажибулла Исмаилович!
Макъала гьазурдайла чаз малум хьайивал, Гьукуматдин виниз тир стипендиядин сагьиб, РД-дин Кьилин стипендиядин иеси Нажибулла Вердихановаз, ада кIелунрин рекье къазанмишзавай агалкьунар фикирда кьуна, кIелунин 2017-2018-йисуз ЦIийи Къурушдал кардик квай рагьметлу Мугьамад-гьажи Хидирован тIварунихъ галай фондунайни махсус стипендия (2000 манатдин кьадарда аваз) тайинарунин къарар кьабулнава.
Муса Агьмедов
