Пешеяр лап гзаф ава. Гьар са пешедиз рехъ гузвайди муаллим я. Муаллимвилин пеше гьар са аялдиз хуш я. Исмаилова Тамиладиз и пеше гьеле сифте классра кIелдайла бегенмиш хьана, рушан рикIе муаллим хьунин мурад гьатна.
Тамилади 2003-йисуз Сулейман-Стальский райондин Вини СтIалрин мектеб вири вадар аваз акьалтIарна Дербентдин педколледждик экечIна. Ина Тамилади вичихъ хци зигьин, дерин чирвилер авайди гьа сифте йикъарилай субутна ада, колледждин общественный кIвалахрани активнидаказ иштиракна. Кьилди къачуртIа, “Гележегдиз кам” конкурсда Тамила кIвенкIвечи студентка хьана. Гуьгъуьнлай, республикадин олимпиадайра гъалиб хьана.
2006-йисуз Исмаилова Тамилади колледж яру дипломдалди акьалтIарна, ам ингилис чIалан муаллим хьана, Санкт-Петербургда аялрин бахчада тербиячивилелай зегьметдин рехъ башламишна. Гуьгъуьнлай хуьруьз хтай Тамиладиз Хив райондин Хореж хуьре муаллимвиле кIвалахун теклифна. И мектебдин директор Гьалимова Калимата ва амай вири муаллимри жегьил пешекар чпин ислягь хизандиз лап хушвилелди кьабулна. Чирвилер мадни артухариз алахънавай Тамилади кIвалахни ийиз, заочнидаказ институтдани кIел хъийизва.
Къастунал кIеви яз зегьмет чIугвазвай винистIалви рушалай аялар, муаллимар, Хореж хуьруьн жемят лап рази я, адаз гьуьрметзава, аферин лугьузва.
Замир Мегьамедов
