Пешедин рекьяй зурба алакьунарни агалкьунар авай, чеб жегьил несилдиз чешне яз, къалуриз жедай лайихлу ксар, чахъ, лезгийрихъ, неинки чи республикада, гьакl адалай къецени гзаф ава. Гьар гьафтеда чна газетдин кlелчияр, чеб Дагъустандилай къеце яшамиш жезвай чи миллетдин лайихлу векилрихъ галаз танишарни ийизва.
Биологиядин илимрин доктор, хуьруьн майишатдин илимрин кандидат, РД-дин хуьруьн майишатдин лайихлу къуллугъчи Музафар Мирзеагъаевич Абасовни еке лайихлувилер авай ксарикай сад я. Ам 1953-йисан 12-февралдиз Сулейман-Стальский райондин Кlварчагърин хуьре дидедиз хьана. 1975-йисуз Музафар Абасова Дагъустандин хуьруьн майишатдин институт тафаватлудаказ куьтягьна. Гьа и йисуз ада Ярославский областдин Рыбинский райондин “Залесье” совхозда кьилин агрономвиле кlвалахиз башламишна. 1979-йисуз Д.Н.Прянишникован тlварунихъ галай Вирисоюздин миянардай шейэрин ва агропочвоведенидин илимдинни ахтармишунрин институтда аспирантурадик экечlна ва 1983-йисуз хуьруьн майишатдин илимрин кандидатвилин диссертация хвена.
1984-йисалай ада Дагъустандин “Дагагропромхимия” тешкилатда агрохимический рекьяй отделдин начальник ва и тешкилатдин председателдин заместитель яз кlвалахна. Мукьуфдивди, гьакъисагъвилелди зегьмет чlугваз хьайи ватанэгьли къуллугъдин рекьяй вини деражайриз акъатна. 1999-йисалай 2007-йисалди Музафар Абасова “Дагъустандин государстводин агрохимический къуллугъдин центр” ФГУ-дин директор яз кlвалахна. И девирда ада, ДГУ-дин экологиядин ва Дагъустандин государстводин хуьруьн майишатдин академиядин лежбервилин кафедрайра профессордин къуллугъдал алаз, тарсар гунин кlвалахни кьилиз акъудна.
М.Абасован регьбервилик кваз жегьил аспирантри диссертациядин кlвалахар кхьена ва абур хвена. 2009-йисуз ам экологиядин ва тlебиат ишлемишунин международный академиядин векил яз хкяна. Лезги алимдин къелемдикай 60-далайни виниз илимдин кlвалахар, 3 монография хкатна.
Музафар Абасова 2007-йисалай Москвада “Вирироссиядин набататрин карантиндин центр” ФГУ-да директордин заместителдин къуллугъдал кlвалахзава ва ам “ВНИИКР” ФГУ-дин алимрин советдин член я.
Алакьунар авай алим мадни кьакьан дережайрив агакьрай!
Куругъли Ферзалиев
