“Сагъ хьурай”, “сагъ чан”, “сагъвал” келимайрихъ дерин мана авайди, инсан азарлу хьайила, мадни ашкара жеда. Ихьтин чIавуз чи рикIелай вири дуьньяни алатзава, ийир-тийир квахьзава… Гьа икI, зунни, сагъсузвал себеб яз, четинвилерни гьалтна (райондай направление гвачирвиляй), Махачкъалада, республикадин кьилин больницада (ЦРБ), неврологиядин отделенида къаткурна. Пакад юкъуз чун авай 6- палатадиз (рикIел А.П.Чехован “Палата № 6” гьикая хтана) сивел хъвер алаз, юкьван буйдин, кьезил камаралди йигинвал къачуна, сагъар хъийидай духтур акъатна. Ада палатада авайбурухъ дикъетдивди яб акална, яргъалди хабарар кьуна, сагъ хъжедайдахъ инанмишарна. Духтурди вичин кIвалах намуслувилелди кьилиз акъудзавай. Гьар юкъуз палатадиз къвез, чи гьал ахтармишзавай, лазим меслятар гузвай, герек чараяр аквазвай.
Сагъламвал са бубат хьайила, за и духтурдихъ галаз санал кIвалахзавай юлдашдивай адан ери-бине чирна, палатайра авай кефсузбурукай ва, сагъ хъхьана, хъфей ксаривайни хабарар кьуна. Чир хьайивал, Шерифова Жанна Александровнадин диде Нуриятани и больницада 40 йисуз кIвалахнай. Гила руша дидедин рехъ давамарзава.
Ж.Шерифовади Махачкъаладин 22-нумрадин юкьван школа классдай-классдиз вири вадар аваз, гьуьрметдин грамотайриз ва къиметлу пишкешриз лайихлу жез, кIелна. 1994-йисуз анаг къизилдин медалдалди акьалтIарна. Гьа и йисуз Дагъустандин медицинадин институтдиз гьахьна. Гьанани Жанна Александровнади вичин дерин чирвилер, дагъви рушан кьетIен къилих къалурна. Зачетрин книжкадиз анжах вадар къвез хьана. Гьа са вахтунда вузда кьиле тухузвай общественный вири мярекатрани иштиракна, илимдинни ахтармишунрин кIвалахда активвал къалурна. Башламишай гьар гьи кIвалах хьайитIани кьилиз акъудиз хьана. Студентвилин йисар акуна-такуна акъатна. Ада яру дипломдалди институтни куьтягьзава.
Гьеле вуздин 3-курсуна кIелзамаз, гинекологиядин отделенида медсестравиле кIвалахиз хьайи ам, 2000-йисуз вичин играми дидеди яргъал йисара зегьмет чIугур больницадиз кIвалахал кьабулзава. Яваш-яваш чирвилер практикада ишлемишзава, чIехибурувай меслятар къачузва, мад ктабар, илимдин махсус литература тупIалай ийизва. Дагъустанда ва Москвада жезвай форумра, конференцийра, “Йисан духтур” конкурсра иштиракзава. Гаф кватай чкадал лугьун кутугнава: Жанна Шерифова “РД-дин здравоохраненидин отличник”, кьилин категориядин духтур я.
Бажарагълу пешекардин кIвалахдикай ЦРБ-дин неврологиядин 2-отделенидин заведующий Мегьамедова Заира Алиевнади икI лугьузва: “Жанна Александровна лагьай гаф кьилиз акъуддай, хиве авай везифаяр намуслудаказ тамамардай, милайим, руьгь-рикI хци, чарадан тIалдикай хабар кьадай духтур я. Адаз вичин кIвалах пара кIанда, чIехи пай вахт больницада акъудзава. Ам вирибурухъ галаз хъсан рафтарвал хуьдай, лезги ягь-намус авай, вини дережадин пешекар я. За адаз екез гьуьрметзава. Ахьтинбур гзаф хьанайтIа, чи уьмуьр мадни хъсанди жедай”.
Отделенида зегьмет чIугвазвай медицинадин юкьван персоналди, гьа жигьетдай яз, Базуева Тазангуьла, Муртазалиева Патимата са сивяй хьиз лугьузва: “Жанна Александровна вичин кIвалахдиз гзаф фикир гудай, дерин чирвилер авай, вичелди инсанар микьнатIисди хьиз чIугвадай, ачух рикI авай, чарадан дердийриз яб гудай, санал кIвалахзавай юлдашрин патай еке гьуьрмет авай духтур я”.
Жанна Шерифовадин тIварцIихъ хуш келимаяр, сагъ хъхьайла, шадвилин лувар кваз, уьмуьрдин рехъ давамарзавай дагъустанвияр тир М.Расулова, Ш.Жаватова, М.Бутаева, А.Гьажиева, Н.Идрисовани эзберзава.
Алава къейд. Жанна Александровнадин ери-бине Мегьарамдхуьруьн райондай я. Буба Разаханов Александр Разахановича, инженер яз, хейлин йисара Даггостехуниверситетда кIвалахна. Диде Нурията, чна винидихъ къейднавайвал, духтур яз хейлин йисара РКБ-да зегьмет чIугуна. Уьмуьрдин юлдаш Шерифов Назим инженер-проектировщик я. Абурухъ пуд руш ава: Элвира, Милана, Наида. Элвиради школа къизилдин медалдалди акьалтIарна. Алай вахтунда Дагъустандин государстводин медицинадин академияда хъсан къиметар аваз 2-курсуна кIелзава.
Чи мурад Жанна Александровнадихъ чандин сагъвал ва хизанда мадни хушбахтлувал хьун я.
Камалдин Агьмедов
