И йикъара Россиядин Федерациядин ва Дагъустан Республикадин лайихлу духтур, Дербент шегьердин гьуьрметлу агьали, рагьметлу гинеколог-хирург Рамазанов Рамазан Жамалдинович яшамиш хьайи кlвалерин цлал, ам эбеди яз рикlел хуьнин лишан яз, мемориалдин кьул ачухунин мярекат кьиле фена.
И мярекатда Дербент шегьердин кьил Малик Баглиева, адан заместителри, общественный палатадин векилри, шегьердин собранидин депутатри, интеллигенциядин векилри, рагьметлудан ярар-дустари ва къуни-къуншийри иштиракна.
Анал рахай М.Баглиева, мукьва-кьилийри, къуншийри ва дустари Рамазан Жамалдиновичан тIварунихъ гзаф хуш келимаяр лагьана, адан гьар йикъан кlвалах ва хъсан крар, зегьмет чlугур йисара ада 6 агъзурдав агакьна операцияр кьиле тухвайди рикlел хкана.
— Къе адан 81 йис тамам жедай, — кlватl хьанвайбурухъ элкъвена лагьана Рамазан Жамалдиновичан стхади. — Лап гъвечlи чlавалай Рамазана чи къайгъу чlугвадай. Багъри кас къакъатун — им чlехи тlал-хер я. Къенин мярекатди чи хизандин тlал кьезиларзава. Шегьердин администрациядиз, депутатриз ва гьакlни и мярекатдиз атанвай вири сагърай.

Къагьриман Ибрагьимов