15-октябрдиз Махачкъаладин Советский райондин судди къуллугъдин рекьяй векилвилерин сергьятдик акат тийизвай, залан нетижайрал гъайи гьерекатар авунай тахсир кутунвай Дагъустандин меркездин виликан мэр Муса Мусаеван гьакъиндай къарар акъудна.
Суддин пресс-къуллугъди “Лезги газетдиз” хабар гайивал, Мусаеваз 4 йис кар ганва. Дустагъда тунилай гъейри, адаз 3 йисан къене гражданвилин ва муниципалитетдин къуллугъар кьиле тухун къадагъа авунва.
РикIел хкин, силисдин делилралди, Махачкъаладин виликан мэрди 2016-2017-йисара чилин вад участок къанунсуздаказ масабурун хсусиятдиз вахкана. Санлай къачурла, абурун майдан 18 агъзур кв. метрдиз барабар тир. Нетижада республикадин бюджетдиз 48 миллион манатдин зарар хьана.
РФ-дин Силисдин комитетдин къуллугъчийри вахтунда кьабулай серенжемрин нетижада Мусаева къанунсуздаказ чара авур вири чилер элкъвена шегьердин хсусиятдиз вахканва.
Чи мухбир
