Алай йисан 16-октябрдиз Дербент шегьердин Собранидин депутатри шегьердин администрациядин кьил хкяна. Ам РФ-дин Федеральный Собранидин Федерациядин Советда РД-дин Халкьдин Собранидин патай векил Сулейман Керимован куьмекчивиле кIвалахай Хизри Абакаров я.
Сессиядал гьялзавай сад лагьай месэладин гьакъиндай шегьердин Собранидин председатель Мавсум Рагьимов рахана ва ада конкурсдин комиссия тамамвилелди тешкилнавайдакай, герек малуматарни СМИ-ра ва Собранидин махсус сайтда эцигайдакай малумарна.
Конкурсдиз вад касди документар вуганвай, абурукай пуда чпин арзаяр вахчуна.
Конкурсдин комиссияди шегьердин кьилин къуллугъдал кандидатрин хсуси ва пешекарвилин ерийриз къимет гана ва абур шегьердин Собранидин депутатрин вилик гъунин месэла гьялна.
Хизри Мегьамедович Абакаров 1960-йисуз дидедиз хьана. Ам Гуниб райондин Салта хуьряй я. Ада РД-дин Халкьдин Собранидин патай РФ-дин Федерациядин Советдин сенатор тир Керимов Сулейман Абусаидовичан куьмекчивиле ва “Махачкъаладин международный аэропорт” ОА-дин директоррин Советдин председателвиле кIвалахзавай. Кьвед лагьай кандидат Рустамбег Седрединович Пирмегьамедов 1983-йисуз дидедиз хьана. Ам “ТехСпортСервис” ООО-дин генеральный директор я.
Вичин рахунра Хизри Абакарова депутатрин ва вири шегьерэгьлийрин патай куьмек галачиз са карни вилик тефидайди къейдна.
— Вилик гьихьтин четин кIвалахар, гьялна кIанзавай гьикьван муракаб месэлаяр кватIа, за хъсандиз гьиссзава, — лагьана ада. — Къенин юкъуз шегьердин бюджет 1 миллиардни 450 миллион манатдиз барабар я. Гьелбетда, икьван кесиб бюджетдалди гзаф крар кьилиз акъудиз жедач. Зун и жавабдар къуллугъдал теклифнавай сенатор Сулейман Керимов и бюджетдин кьадар са шумуд сеферда гзафариз гьазур я. Гъиле пул хьайила, кIвалахарни тамамариз жеда. Чна шегьерда туризм вилик тухудай кьетIен программа туькIуьрнава. Адан бинедаллаз мугьманханаяр, кафеяр, ресторанар, кинотеатрар эцигда, куьчейра тамамвилелди эквер твада, инженерный коммуникацияр цIийи хъийида ва икьван гагьда тавунвай маса крарни кьилиз акъудда.
Кьвед лагьай кандидат Рустамбег Пирмегьамедовани депутатар вичин программадихъ галаз танишарна.
Депутатри, ачухдиз сес гуналди, Хизри Абакаров Дербент шегьердин администрациядин кьилин къуллугъдал хкяна. И къуллугъ адаз РФ-дин Государстводин Думадин депутатар тир Гьажимет Сафаралиева, Абдулгьамид Эмиргьамзаева, Мурад Гьажиева, Заур Аскендерова, Юрий Левицкийди, РД-дин Халкьдин Собранидин депутат Мегьамед Садулаева, шегьердин Собранидин депутат Видади Бабаева тебрикна.
Сессиядал РФ-дин Федерациядин Советдин сенатор Сулейман Керимовни рахана. Ада виридаз гъилер къакъажна, кIвалахуниз, шегьер патал сифте нубатда вуч герек ятIа, гьам тайинаруниз, кар алай месэлаяр галай-галайвал гьялуниз ва цIийи регьбердиз куьмек гуниз эверна. Гьукуматдин бюджетдай Дербент шегьердиз гузвай гьар са манатдал вичи 4-5 манат эхцигдайди хиве кьуна.
Ада Хизри Абакарова вичин хиве тунвай везифаяр ян тагана кьилиз акъуддайдахъ ва Дербент шегьер патал кIвалахдайдахъ инанмишвална.
Эхиримжи варцара Дербент шегьердин администрациядин кьилин къуллугъ вахтуналди тамамарай Энрик Муслимова вичиз ихьтин мумкинвал гунай РД-дин Кьил Владимир Васильеваз ва и варцара вичихъ галаз кIвалахай шегьердин Собранидин депутатриз, сиясатдин партийрин, жемиятдин организацийрин векилриз ва вири шегьерэгьлийриз сагърай лагьана. КIвалахай варцара, ада къейд авурвал, 19 миллион манат кьенятна ва и пул куьчейра къир цуниз, зирзибил михьдай махсус техника ва маса аппаратура къачуниз харжда. Шегьердин цIийи регьбердизни ада къуллугъ мубаракна ва къадим шегьердин экономика, культура вилик тухунин, шегьерэгьлийрин яшайиш хъсанарунин карда агалкьунар хьун алхишна.
Гьазурайди — Нариман Ибрагьимов
