Алатай вацран эхирда Македониядин меркез Скопьеда азаддиз кьуршахар кьунай устадрин арада дуьньядин чемпионат кьиле фена. Идакай «Лезги газетдиз» «Кьурагь район» МР-дин администрациядин пресс-къуллугъди хабар гузва.
Чемпионатда 39 уьлкведай 300-далайни гзаф спортдин ветеранри, гьа жергедай яз Кьурагь райондай тир Эрелар Фейзуллаевани иштиракна. Къейд ийин, Э.Фейзуллаевакай кьве варз идалай вилик Россиядин чемпион хьанай.
Чи ватанэгьлиди 88 килограммдин заланвал авайбурун арада бягьсер кьиле тухвана. Спортсменди вичи ихтилатзавайвал, адан группада 15 спортсмен, гьа жергедай яз алатай йисан дуьньядин чемпион ва адалайни вилик чемпионвилин тlварар къазанмишнавай устадар авай.
Дуьньядин чемпионатдин нетижада Э.Фейзуллаевакай кишпирдин призер хьана. Къуй адахъ спортдин рекье мадни вини дережадин агалкьунар хьурай!
«Лезги газет»
