Ихьтин кьил алаз “ЛГ-дин” 1-июндиз акъатай 22-нумрадин сифте чина чапнавай Хийир Эмирован макъалада женгчи шаир Кьуьчхуьр Саидан 250 йис тамам жезвайдакай, юбилей лайихлувилелди къейдун лазим тирвиликай хабардарзава.
Гьайиф чIугунивди къейдзава хьи, РД-дин Гьукуматди, культурадин министерстводи и кардиз талукь яз гьелелиг са серенжемни кьабулнавач.
Гена 30-майдиз Махачкъалада кIватI хьайи шаирдихъ рикI кузвай рухвайри адан гьакъиндай чпин фикирар лагьана, теклифар гана.
Чахъ лезги писателрин Союз, райондин, хуьрерин администрацияр, шаирдихъ рикI кузвай гзаф ксар ава. Хандин зулумдиз акси экъечIай шаирдин — ашукьдин тупIар чуьнгуьрдал хьана. Кьуьчхуьр Саид кичIебурукай тушир. Адан бейтер, халкьдин сиверай сивериз чкIана, чал агакьна. Шаирдин яратмишунар кIватIна, къени са тайин ктаб акъуд тавун тажуб жедай кIвалах я.
Умудлу я хьи, зулуз шаирдин хайи хуьре чIехи мярекат кьиле тухуда. Куьмекдин гъил яргъи ийидайбур тахьана амукьдайди туш. Зунни гьазур я, жуван пай кутаз.

Шагьабудин Шабатов,
писатель, РД-дин культурадин лайихлу работник