1961-йисуз Докъузпара райондин Гуьне патан вири хуьрер: Филер, Гъугъванар, КIамакучунар, Кучунар, Хважаяр, Чахчар гьукумдин буйругъдалди Мегьарамдхуьруьн райондин чилерал куьчарнай. Куьчарнавай хуьрериз и районда гьардаз чпин хуьрерин тIварар алай къазмаярни авай. Къазмаяр авачирбур Филерни КIамакучунар тир. Филер Заготскотдин чилерал куьчарна, КIамакучунар — КьепIир-Къазмайрал. Куьрелди, куьчарнавай вири хуьрерал чпин виликан тIварар алама. Тек са зи хайи хуьруьн — КIамакучунрин тIвар квахьнава.
Куьч хьанвай КIамакучунрин чIехи пай кIвалер КьепIир-Къазмайрал са цIийи магьледа ава. Адаз вирида КIамакучунрин магьле лугьузва.
2017-йисуз зун хуьруьз хъфейла, КIамакучунрин магьледа яшамиш жезвай кьепIирви Исаев Агьмед Мегьамедовича заз лагьанай: “Чаз и куьче 1941-1945-йисара Ватандин ЧIехи дяведин женгера иштиракнавай, 1961-йисалай 1986-йисалди и куьчеда яшамиш хьайи Алибегов Абдулкерим Алибеговичан тIварунихъ ягъиз кIанзава”. Квез гьакI меслят аквазватIа, жемятдини разивал гузватIа, зунни рази я лагьанай за.
2018-йисан июндиз КIамакучунрин магьледиз хъфейла, за Агьмедовавай а вуна авур ихтилатдин эхир гьикI хьанай лагьана хабар кьуна. И сеферда чна ихтилат ийизвай чкадал Эльдер буба ва мад маса ксарни алай. Эльдер бубади лагьана: “Зи буба, зи пуд стха дяведа кьейиди я…”
Куьче нин тIварцIихъ ядатIа, маса фикирарни ава. Гьавиляй заз вири рази жедай ихьтин рекьер къалуриз кIанзава. КIамакучунрин магьледин куьче КIамакучунрин хуьруьн тIварунихъ ягъин (ул.Кама-Кучун). Идалди чна чи хайи хуьруьн тIварни квадардач, са касни бейкеф язни амукьдач!
Кьвед лагьайди, 1941-1945-йисара Ватандин ЧIехи дяведин женгера иштиракнавай кIамакучунвийрин тIварар кхьенвай мармардин къван (обелиск) КIамакучунрин магьле башламишзавай чкадал эцигин. И кIвалах кьилиз акъудун важиблу, лайихлу кар я. Ахьтин обелиск эцигайла, вири рази яз амукьда, чи несиларни хайи Ватан кIан хьунин руьгьдаллаз тербияламиш жеда.
1986-йисуз республикадин больницадай аххъайнавай зи дах чна хуьруьз хутахзавай. Дахди заз лагьанай: “Чан хва, Гъепцегьрал агакьайла, Шалбуз дагъ аквадай чкадал ва КьепIиррин кьилихъ агакьайлани, машин акъвазара”. Дах чна “Москвичда” аваз месни экIяна, къаткурна хутахзавай. Гъепцегьрал агакьайла, чна дахди лагьайвал авуна ва адаз ацукьиз куьмек ганай. Дахди, Шалбуз дагъдихъ элкъвена, гьакI КьепIир-Къазмайрин хуьруьн кьилихъ агакьайла, сурарихъ элкъвена, дуьаяр авунай.
Зун хуьруьз хъфидайла, КIамакучунрин магьледиз винидихъай хъфидай рекьяй хъфизвайди я. Заз лугьуз кIанзава: зи дахди, Шалбуз дагъдиз, КьепIир-Къазмайрин сурариз, чин элкъуьрна, дуьаяр авурди хьиз, чи мурад кьилиз акъатайла, зун, са зун ваъ, вири винидихъай хквезвай рекьяй хъфидач, 1941-1945-йисара Ватандин ЧIехи дяведин женгера иштирак авур аскеррин тIварар кхьенвай мармардин къванцин вилик акъатдайвал, агъа рекьяй хъфида, фронтовикрин фамилияр кхьенвай обеликдин вилик акъвазна, са дуьани авуна, ахпа чавай чи хайи хуьруьн тIвар алай куьчедиз салам гуз жеда!
Уьмуьр гайи буба, диде,
Жув чIехи хьайи ери-бине —
Самур буллах, Самур дере —
Уьмуьрлухда жеда рикIе.
Мирим Алибегов
