Къизляр районда Дагъустанда гьасилзавай прунздин са пай гьялиз жедай кьве завод кардик кутада. Идан гьакъиндай саласа юкъуз сессиядал РД-дин Гьукуматдин кьил Артем Здунова малумарна. “Республикада гьасилзавай прунздин 50 процентдив агакьна гьялиз жедай кьве завод кардик акатда”, — лагьана ада.
Идалай гъейри, адан гафаралди, алай йисуз 300 миллион манатдилай гзаф къимет авай Старотеречный дигидай цин системадин объектар цIийикIа туькIуьр хъувунин кIвалахар башламишда. И карди республикадин кеферпата прунз цадай майданар 21 агъзур гектардив агакьдайвал гегьеншардай мумкинвал гуда.
Виликрай хабар гайивал, 2018-йисан зулуз Къизляр районда прунз гьялдай кьве завод вахкун планламишнава. Абур, региондин хуьруьн майишатдин министерстводин делилралди, виридалайни гзаф прунз гьасилзавай, Сарсар хуьре авай “Нива” ООО-ди (адахъ прунз цадай 2 агъзур гектар чил ава) ва “Кизляр-Агрокомплекс” ОАО-ди (Черняевка хуьр) эцигна.
Дагъустандин хуьруьн майишатдин министерстводин малуматдалди, Сарсар хуьре эцигзавай заводдин гужлувал — 120 агъзур тонн, Черняевкада эцигзавайдан къуватлувални 30 агъзур тонндилай виниз жеда.
Чи мухбир
