14-сентябрдиз Кьурагь районда мектебда кlелзавайбурун арада кьезил атлетикадай акъажунар кьиле фена. Кьурагьрин спортдин майдандал школьникрин арада спорт машгьурунин, ажегьилар спортдал желб авунин макьсаддалди кьиле фейи акъажунар Дагъустандин халкьарин садвилин йикъаз талукьарнавай. И гьакъиндай «Лезги газетдиз» райондин администрациядин пресс-къуллугъди хабар гузва.
Къейд ийин, Кьурагь районда кьезил атлетикадай и акъажунар цlи 7-сеферда кьиле тухвана. Санлай къачурла, акъажунра 16 командадай 135 касди иштиракна. Жегьилри спортдин са шумуд жуьредай чпин алакьунар къалурна. Кьилди къачуртlа, спортдин мярекатдин программадик 60 метрдиз чукурун, яргъал мензилдиз чукурун, алай чкадилай хкадарун, граната гадарун ва маса дисциплинаяр квай.
Мярекатдин сифте кьиле райондин физкультурадин, спортдин ва жегьилрин крарин рекьяй отделдин начальник Рамиз Рамазанов рахана. Ада райондин руководстводин ва вичин патай спортдин мярекат тебрикна, иштиракчийриз агалкьунар тlалабна. Кьуд сятни зура кьиле фейи акъажунра спортдин судьяйри лап хъсан спортсменар тайинарна.
Командайрин арада сад лагьай чка Кьурагьрин 1-нумрадин мектебди, кьвед лагьай чка Аладашрин мектебди ва пуд лагьай чка Кьуьчхуьррин мектебди кьуна. И командайрин капитанрив медалар, грамотаяр ва футболкаяр вахкана. Гъалиб хьайи ва хъсан чкаяр кьур спортсменар (гадаярни, рушарни) кьилди медалралди, грамотайралди ва футболкайралди къейдна.
«Лезги газет»
