11-сентябрдиз Мегьарамдхуьруьн райондин администрацияда райондин кьил Фарид Агьмедован регьбервилик кваз хуьрерин администрациядин кьилерихъ галаз совещание кьиле фена. И гьакъиндай «Лезги газетдиз» райондин администрациядин пресс-къуллугъди хабар гузва.

Совещанидин кlвалахда райондин идарайринни тешкилатрин жавабдар къуллугъчийри, налогрин инспекциядин векилри ва масабуру иштиракна.

Анал эменнидин ва чилерин налогар кlватlунихъ галаз алакъалу месэла, гьа жергедай яз тамамарнавай крарни веревирдна.

Кьилди къачуртlа, нубатдин совещанидал ихьтин пуд месэладиз килигна:

Хуьрерин бюджетриз эменнидин налогар атун;

Хуьрера чилин участокар актуализация авун;

Хуьрера аншлагар тайинарун ва михьивилин жигьетдай анра авай гьалар.

Ф.Агьмедова налогар кlватlунин месэла кьетlен гуьзчивилик квайдакай ва и кар алай хел тамамарун гзаф важиблу тирдакай лагьана. Алай вахтунда налогрин жигьетдай райондин хуьрера авай гьаларикай райондин кьилин заместитель Ариф Гьажиева ихтилатна.

Совещанидал къарагъарнавай месэлаяр веревирдна ва абур гьялдай рекьер жагъурна. Эхирдай райондин кьили жавабдар къуллугъчийриз талукь тир тапшуругъарни гана.

«Лезги газет»