Дуьньядин винел алай ажайиб гьайванрикай сад комондор тlвар алай жинсинин кицl я. Адаз Венгриядин овчарка лугьузва. Кlвалин гьайванрик акатзавай комондордин чlарарихъ хъсандаказ гелкъуьн герек я, гьикl хьи, абурун яргъивал гагь-гагь метрдив кьван агакьзава. И гьайвандал “Венгриядин хипен кицlерин пачагь” лакlабни акьалтнава. Комондор дуьньяда авай виридалайни еке кицlерикай сад я. И жинсинин бязи кицlерин кьакьанвал 80 сантиметрдив агакьзава. Яргъи ва лацу чlарари кицl мадни чlехи ийизва. И гьайван хуьн, адаз ем гун четин кар туш. Муькуь кицlери хьиз, и жинсинини са юкъуз 1 килограммдилай гзаф ем незва.
Комондордин кlарабар гзаф кьезилбур я. Хипер хуьдай чубандин кlвалахдихъ галаз хъсандиз вердиш и кицI хипен сариз ухшар чlарар себеб яз, суьруьдин арадай саки чир жедач.
Алимри гьисабзавайвал, и жинс дегь заманадин са шумуд жинсинин хипен кицlерикайни жанавуррикай арадал атанва.
Гьазурайди — Куругъли Ферзалиев
