Макъала кхьинин гьевес кутурди Ватандин ЧIехи дяведин къизгъин женгера душмандин винел гъалибвал къачуник вичин лайихлу пай кутур Къайтагъ райондин Санчи хуьряй тир викIегь хва Мегьамед-Расул Тавкаев я.
Дяве башламиш жедалди са шумуд йисуз ада партиядин Къайтагъ райкомдин 1-секретардин, ахпа райисполкомдин председателдин везифаяр тамамарнай. И къуллугърал алай девирда адалай район аваданламишиз, инсанрин яшайишдин шартIар хъсанарунин карда агалкьунар къазанмишиз алакьнай.
Немсерин чапхунчияр Кавказ кьун патал гьужумдиз гьазур жезвай вахтунда Буйнакск шегьерда гуьгьуьллудаказ фронтдиз физ кIанзавайбурукай ибарат атлуйрин эскадрон тешкилзавай. Меркездин регьберривай разивал къачуна, М.-Р.Тавкаевни Буйнакскдиз рекье гьатнай. Эскадрондин командир Къара Къараев тир. Эскадрондин штабдин парторг хьайи ада женгинин рехъ Моздокдилай башламишна, Берлинди рей гайидалай кьулухъ куьтягьна.
Хайи макандиз ам, дяве куьтягь хьайила, капитандин чинда аваз хтана. Дяведилай гуьгъуьнин йисара ам, районриз физ, женгинин иштиракчийрихъ галаз гуьруьшмиш жедай, алакъаяр хуьдай. 1957-йисуз М.-Р.Тавкаев Докъузпара райондизни (шикилда) мугьман хьанай. Инани ада дяведин иштиракчийрихъ галаз гуьруьшар кьиле тухванай.
Ишреф Жаватов
