13-июлдиз РФ-дин Президент Владимир Путина Каспийскдай тир 19 йис хьанвай Шамиль Устарбеговав ОНФ-дин (Общероссийский народный фронт) «Все для Победы» пишкеш вахкана. И кардиз талукьарнавай шад мярекат Москвада милли «Россия» центрада кьиле фена.
Ш. Устарбеговаз чIехи дережадин пишкеш гунин себеб ам я хьи, жегьилди Дагъустанда къати марфар къуникди яд акьалтай вахтунда 20-далай гзаф инсанар къутармишиз куьмекна.
Дагъустанвидиз уьлкведин Президентдин гъиляй пишкеш гунин ва Шамилан кьегьалвилин гьакъиндай вичин фикирар РД-дин Кьилин везифаяр вахтуналди тамамарзавай Фёдор Щукина лагьана:
«Шамилан кьегьалвилиз государстводин дережада лайихлу къимет гунал за дамахзава. Им неинки кьилди са адан викIегьвал къейд авун я. Малум тирвал, викIегьвал, масад патал чан къурбанд ийиз гьазурвал, куьмекдихъ муьгьтеждаз гъил яргъи авун гьар са дагъустанвидин ивидик ква. 19 йис хьанвай Шамилан кьегьалвилиз къимет гун вири дагъустанвийрин викIегьвал къейд авуна лагьай чIал я».
РикIел хкин, алай йисан гатфарихъ къати марфар къвайи чIавуз Каспийск шегьердин бязи куьчейрални яд акьалтнай. И чIавуз Шамила, къайи це сирнавиз, дишегьлийриз, аялриз хатасуз чкадиз экъечIиз куьмекна. Садазни кьведаз ваъ, къадалай гзафбуруз. Гьар садаз куьмекдайла, ам нубатдин сеферда, вичин сагъламвал хаталувилик кутаз, циз гьахьзавай. Им, гьакъикъатдани, инсандин викIегьвал, хъсанвал я.
Фёдор Щукина къейд авурвал, Шамила авур хьтин кьегьалвал гьатта чIехи итимрин арадани гьар нелай хьайитIани алакьдач. Гьавиляй викIегь дагъустанвидал вири республикади дамахзава.
Агьмед Магьмудов
