15-июндиз республикадин меркезда, гьакI са шумуд муниципалитетда, гьа гьисабдай яз Мегьарамдхуьруьн райондани тамам 5 юкъуз кьиле фейи фольклордин ва адетдин культурадин «Дагъвияр» международный XXIV фестиваль акьалтIна.

Макьсад Россиядин (гьа гьисабдай яз Дагъустандинни) ва дуьньядин халкьарин милли медениятдин ирс хуьникай ва вилик тухуникай, халкьарин арада дуствилин алакъаяр мягькемаруникай ва абурун культурадихъ галаз таниш хьуникай ибарат тир ана цIи къецепатан 7 уьлкведай (Индия, Белоруссия, Непал, Египет, Къиргъизистан, Туьркменистан, Узбекистан) ва Россиядин са шумуд региондай атанвай, гьакIни Дагъларин уьлкведин яратмишунардай коллективри чпин устадвал къалурна. Виликан йисара хьиз, цIини и мярекат Дагъустандин Кьилин ва Гьукуматдин, РФ-дин культурадин министерстводин, Дагъустандин культурадин министерстводин, Республикадин халкьдин яратмишунрин кIвалин куьмек галаз ЮНЕСКО-дин крарин рекьяй РФ-дин комиссиядин къаюмвилик кваз тешкилнавай.

ЦIинин программани гзаф гегьеншди тир. Аник жуьреба-жуьре жанрайрин мярекатар — концертар, халкьдин сеняткарвилин устадрин выставкаяр, мастер-классар, халкьдин милли пек-парталдинни манийрин суварар, республикадин муниципалитетрин ансамблринни мугьманрин коллективрин фольклордин къекъуьнар квай. 12-июндиз, Россиядин юкъуз, сувариз талукьарнавай мярекатарни гзаф итижлубур хьана.

Фестивалдиз гьазурвал акунин месэлайриз талукьарнавай пресс-конференциядал Дагъустандин культурадин министр Зарема Бутаевади къейд авурвал, мугьманри чпин культура, гьунарар, устадвал дагъустанвийриз къалурзава, гьа са вахтунда абур чебни Дагъларин уьлкведин кьетIен рангарин девлетлу культурадихъ галаз таниш жезва. Са гафуналди, «Дагъвияр» фестиваль тежриба пайзавай ва къачузвай майдандиз элкъвезва.

Рагнеда  Рамалданова