2009-йис алукьнавай. Геждалди телевизордиз килигна, зун анжах ахварал фенвай. Садлагьана сада зенг авуна. Йифен и геж вахтунда инжиклу ийизвайди им вуж хьуй? КIанзни-такIанз къарагъна, хъел кваз, за кIевиз «ало!» лагьана.
– Алукьнавайди ваз вучтин йис ятIа чизвани? – хабар кьазва атIа кьиляй редакцияда захъ галаз санал кIвалахзавай Алаудин Гьамидова.
– Им гьи вахт я вуна зенгзавайди? Пакадин югъ амачирни? – лагьана, хъел къвез кIан хьана заз.
– Сад лагьайди, им ви юбилейдин йис я. Кьвед лагьайди, за ваз, гьи чIавуз хьайитIани, жуваз кIан хьайивалди, зенгда, – дуствал суткадин кьиляй-кьилиз жедайди я (дружба бывает круглосуточной) лагьана, кинофильмайрик квай актер Папанова хьиз, са шумуд мертебадин хъверна Алаудин Халидовича.
Алатна са кьадар йисар. Зи фикирда «кьисас» вахчун авай. Алаудин, арза кхьена, кIвалахдилай элячIна. Хъвер, зарафат кIандай, дустарал гзаф рикI алай, абурни вафалубур хьана кIандай кас я Гьамидов. Яргъал йисара санал кIвалахай ихьтин инсан патав гумачирла, гьелбетда, сугъул жеда. Ара-бир ам вич акъатда редакциядиз. Гагь-гагь чун паркуна урус учительницадиз хкажнавай гуьмбетдин патав ацалтда. Ихьтин вахтара дустуни, гьеле яргъал аламаз, вичиз хас тирвал, «огьо, вунни ахквада кьван!» лугьуз, зарафатда, хвешивалда.
2018-йис алукьнавай йиф. Гьамидоваз «кьисас» хкьун зи фикирдай акъатнавачир. Сятдин 1-даз хьиз зани адаз зенгда.
– Йифиз вири ксудайди я. Им гьи чIав я вуна зун инжиклу ийизвайди? – хъел ква Халидовичак.
– Ято-у! – гьа вичи хьиз гьарайна зани. Сад лагьайди, ваз ЦIийи йис мубаракрай! Кьвед лагьайди, ваз алукьнавайди кьетIен йис тирди чизвани? ЦIи ви юбилей жезвачни бес! За, пакадал тевгьена, зенг авунин себеб ам я хьи, дуствал неинки суткадин, гьакI вацран, уьмуьрдин кьиляй-кьилиз жедайди я, – ила зун хъуьрена Папанован тегьерда.
РикI ачух, шад инсан я Алаудин. Адахъ вири миллетрикай дустар гзаф ава. Лезгидихъ галаз – лезгидалди, табасаранвийрихъ, агъулвийрихъ галаз гьабурун чIаларалди хушдаказ рафтарвалда касди.
Редакциядай хъфидайла, ада заз, ядигар яз, цлакай куьрсдай элкъвей еке гуьзгуьни вичин «Багьа чил – багьа накьвар» ктаб багъишна. Ам гьакIан са гуьзгуь туш, суьгьуьрдинди я. Гьар экуьнахъ жуван кабинетдиз гьахьайла, ада зи салам кьабулзава, кеф-гьал жузурла, жаваб гузва, рахазва. Пара сагърай, дуст, вун – кутугай савкьат туна вуна заз. Ада заз шадвал, вакай хабарар гузва. Адай заз неинки жув, гьакI ви къаш-къаматни аквазва. Заз багъишнавай ктабдал авторди ихьтин гафар кхьенва: «Сирерин, тIалрин-квалрин гъавурда акьазвай вафалу дустуниз».
Мубаракрай ваз кьве муьжуьд.
Акваз хьурай вун чаз дириз.
Зарафатиз, хъуьрез милиз,
КIвачел хьурай, кIубан хьурай!
Ш. Шихмурадов
