Дагъустандин госуниверситетдин юридический институтдин студентка Айшат Яралиевади Вирироссиядин студентрин юридический олимпиададин 2026-йисан финалдин паюна гъалибвал къазанмишна, хабар гузва вуздин пресс-къуллугъди.
Гележегдин юристрин арада акьулдиз, кьатIунунин бажарагъдиз талукь уьлкведин виридалайни зурба акъажунрикай сад тир и олимпиада 30-майдиз Москвадин М.В.Ломоносован тӀварунихъ галай госуниверситетдин бинедал кьиле фена.
ДГУ-ди ана са шумуд рекьяй акъажунра иштиракна: информациядин, гражданвилин, налогрин ихтияррай, гьакӀни илимдин кӀвалахриз талукь алава номинациядай.
Пуд лагьай курсунин студентка Айшат Фикретовна Яралиева «Информациядин ихтиярар» номинацияда виридалайни хъсанди яз гьисабна. Ада и месэладиз талукь тир Россиядин вири вузрин векилрихъ галаз гьуьжетунрин, адетдинбур тушир тапшуругърин ва пешекарри мукьуфдивди ахтармишунин шартӀара вичихъ дерин чирвилер авайди раижна.
Гъалибвал къазанмишдалди вилик студент руша информациядин ихтиярдин ва информатикадин кафедрадин доцент Лариса Магьдиловадин гъилик кваз акъажунриз са шумуд вацра гьазурвилер акуна. Ада хиве кьазвайвал, олимпиададин эхиримжи пай иллаки четинди хьана. «Гьуьжетунар, дугъриданни, вини дережада аваз кьиле фена. Гьар са иштиракчи иниз лап хъсандаказ гьазур хьанваз атанвай. Гьавиляй гъалибвал зун патал иллаки къиметлуди я. Им неинки еке шадвал, гьакӀни вилик финин умудрик гьерекат кутадай, пешедай еке дережадив агакьардай ва информациядин ихтияррин рекье чирвилер деринардай себеб я», — лугьузва ада.
Университетдин илимдин ва пешекарвилин школадин дережа олимпиададин экспертрин кӀвалахда ДГУ-дин муаллимри иштиракунини тестикьарна. Жюридик информациядин ихтияррин ва информатикадин кафедрадин заведующий Руслан Абдусаламов, кафедрадин доцентар тир Эльмира Алиева, Замира Агьмедова ва Заира Мусалова квай, къейдзава вуздин пресс-къуллугъди.
Жасмина Саидова
