Дагъустандин Кьилин къуллугъ вахтуналди тамамарзавай Федор Щукинан регьбервилик кваз республикадин призывдин комиссиядин заседание кьиле фена. Анал региондин муниципалитетра гатфарин призыв кьиле физвай гьалдиз, икьрардин бинедаллаз агьалияр къуллугъ ийиз хкязавай ва военный вузриз гьахьиз кIанзавайбурухъ галаз тухузвай кIвалахдиз килигна.
Дагъустандин военный комиссар Абдурагьман Мурадханова малумат гайивал, гатфарин призывдиз талукь кIвалах давам жезва. Махачкъала, Каспийск, Хасавюрт, Къизилюрт, Избербаш, Буйнакск, Къизляр, Южно-Сухокумск шегьерра ва Хасавюрт, Новолак, Къизилюрт, Къумтуркъала, Къаякент, Къарабудахкент, Буйнакскдин, Къизляр районра кIвалах хъсандиз тешкилнава.
Гатфарин призывдихъ галаз сад хьиз, республикадин ва муниципалитетрин военкомри военный вузриз гьахьиз кIанзавай жегьилрин месэлаярни гьялзава. Военкомди малумарайвал, къенин йикъалди 493 жегьилди военный вузрик экечIунин гьакъиндай арзаяр кхьенва. Абурухъ галаз суьгьбетар авунва ва талукь документарни уьлкведин военный вузриз рекье тунва.
Гатфарин призыв тешкиллудаказ кьиле тухун патал армиядиз фидай вахт хьанвай жегьилрин диде-бубаяр талукь законрикай хабардарзава, жегьилрал вахтунда армиядиз эвер гунин чарар агакьарзава, муниципалитетра абурухъ галаз гуьруьшар кьиле тухузва.
Абад Азадов
