Майдин сифте йикъара РД-дин образованидин ва илимдин министр Ягья Бучаева, бажарагълу аялрин «РМЛИ ДОД» лицей-интернатдин директор Альбина Шутуновади, региондин бажарагълу аялар виликди тухунин «Альтаир» центрадин регьбер Аймесей Дибировади Вирироссиядин школьникрин олимпиададин (ВСОШ) эхиримжи пай агалкьунралди акьалтIарна хтай 11-классдин ученица Фаталиева Фируза Сефибеговна шад гьалара къаршиламишна.
Ингилис чIалай уьлкведин мектебра кIелзавай аялар патал эрзиман мурад тир ВСОШ-дин шабагь къазанмишнавай лезги руша Махачкъалада Республикадин бажарагълу аялар патал гзаф рекьерай гьазурвал аквазвай лицейда-интернатда кIелзава. Икьван чIавалдини Фирузади гьар жуьре рекьерай вини дережадин шабагьар са шумуд сеферда къазанмишнай. ИкI, ам ингилис чIалай, литературадай, дуьньядин художественный культурадай ВСОШ-дин республикадин дережада 2025 ва 2026-йисара кьиле фейи паюнин гъалибчи ва шабагьрин сагьиб я. ГьакIни ада Санкт-Петербургдин университетди, РФ-дин Гьукуматдин патав гвай финансрин университетди ва «Высшая школа экономики» НИУ-ди тешкилай са жерге олимпиадайра гъалибвал къазанмишнай.
Амма адан рикIе авай виридалайни еке къаст ва макьсад ингилис чIалай ВСОШ-дин олимпиададин эхиримжи дережада гъалиб хьун тир.
Зурба зегьмет, акьалтIай еке алахъунар, гъалибвилихъ чIугун, тарсунал рикI хьун, йифен кьуларалди кIелиз, чирвилер къачун – вири и терефри талукь тир нетижадални гъана.
Къейдна кIанда хьи, Фирузади олимпиададиз гьазурвал датIана пуд йисан вахтунда акваз хьанай. Ада и кар гьам кьилди, гьамни бажарагъ виликди тухунин «Альтаир» центрадин ингилис чIалан дестеда аваз, муаллим Гьажибегова Диана Велиевнадин регьбервилик кваз кьилиз акъудна.
Алай йисан 23-апрелдилай 30-апрелдалди Москвада давам хьайи ВСОШ-дин эхиримжи паюна Фирузади, 104 балл къазанмишуналди, вичиз и рекьяй лап хъсан дережада чирвилер авайди тестикьарна. Эрзиман мураддиз элкъвенвай шабагьдин чка кьуналди, ада Дагъустан Республикадин тIвар вини дережада хвена, диде-бубадин, мукьва-кьилийрин ва муаллимрин умудар кьилиз акъудна.
Фируза, интеллигент тухумдин неве, Дербент шегьерда 2009-йисуз дидедиз хьана. Сад лагьай класс ада шегьердин 21-нумрадин мектебда акьалтIарна. 2016-йисуз ам хизандихъ галаз Махачкъала шегьердиз куьч хьана, ругуд лагьай классдалди кIелунар 38 лагьай ва 59-мектебра давамарна. Гуьгъуьнлай, ахтармишунин имтигьанар нетижалудаказ вахкуналди, ам бажарагълу аялар патал гзаф рекьерай гьазурвал аквазвай лицей-интернатдик экечIна.
Фирузадин диде-буба СтIал Сулейманан райондин Ивигрин хуьряй я. Буба Сефибег Гьидаятовича Федеральный таможнядин къуллугъда инспектор яз кIвалахзава. Диде Зульфия Амираслановна пешекар экономист, экономикадин илимрин кандидат я. Стха Жавида Москвадин Бауманан тIварунихъ галай госуниверситетда 4-курсуна кIелзава. Адан чIехи ими, профессор, технический илимрин доктор Навруз Гьуьсейнбегович Фаталиеван пуд рушни илимдин кандидатар я. Фирузадин чIехи буба Амираслан Гьамзабегович ва баде Зиядат Къурбановна Мирзабеговар чпиз дериндай гьуьрмет ийизвай муаллимар я. Гьаниз килигна, Фирузадихъ къе ихьтин агалкьунар хьун тажуб жедай кар туш – ам лап хъсан муаллимрин ва алимрин патав тербияламиш хьанва. Рушахъ кIелунин рекье лап хъсан нетижаяр вири тарсарай ава, ада мектеб къизилдин медалдалди акьалтIардайвал я.
Фирузадиз агалкьунар тебрик авуналди, чна адан уьмуьрда мадни еке гъалибвилер хьуник умуд кутазва.
Саида Мурадова
