И йикъара Болгариядин Самоков шегьерда кьуршахар кьунин пуд жуьредай (азаддаказ, грекринни римлуйрин жуьреда ва дишегьлийри кьуршахар кьунай) 15 йисал къведалди жаванрин­ арада кIвенкIвечивал патал кьиле фейи акъажунра Россиядин хкянавай командаяр 1-чкайриз лайихлу хьана. Кьилди къачуртIа, дагъустанви тренер­ Арсланбег Алиеван регьбервилик кваз азаддаказ кьуршахар кьунай Россиядин хкянавай командади, санлай къачурла, 6 медаль къазанмишна (абурукай 4 къизилдинбур я). Спортдин и жуьредай Гуржистандин ва Азербайжандин командайри 2 ва 3-чкаяр кьуна.

Шадвилелди мадни а кардикай хабар гуз кIанзава хьи, уьлкведин хкянавай командадик кваз азаддаказ кьуршахар кьунай къизилдин медалдиз лайихлу хьайибурун арада чи ватанэгьли, спортдин рекье мягькем камар къачунвай Бадрудин Мегьамедовни (52 кг) ава. Акъажунра Шамил Дамурова (44 кг), Умар Ихласова (48 кг) — 1 ва Ибрагьим Ибрагьимова 2-чкаяр кьуна.

Регина Семедова