22-майдиз Махачкъалада машгьур журналист Алик Абдулгьамидован экуь къаматдиз талукьарна журналистрин арада уьлкведин дережада аваз тешкилай «За правду в профессии» конкурсдин гъалибчийрив шабагьар вахкана.

И вакъиадиз талукьарнавай мярекатда Алик Абдулгьамидован дустари, адахъ галаз санал кIвалахай юлдашри, республикадин СМИ-рин регьберри, жуьреба-жуьре министерствойринни ведомствойрин, жемиядин, илимдин векилри, муаллимри, студентри ва масабуру иштиракна. Гьуьрметлу мугьманрин арада РД-дин лайихлу журналист Андрей Меламедов, РД-дин информациядин ва печатдин Агентстводин регьбердин везифаяр вахтуналди тамамарзавай Арсен Юсупов, РД-дин рекъемрин рекьяй вилик финин министрдин везифаяр вахтуналди тамамарзавай Юрий Гьамзатов, Махачкъала шегьердин депутатрин Собранидин председатель Хиби Алиев, журналист, политолог Ханжан Къурбанов, военкор Гьуьсейн Гьуьсейнов ва масабур авай.

Журналистрин межлис «Дагъустан» РГВК-дин векилри Алик Абдулгьамидован уьмуьрдин ва яратмишунрин рекьикай гьазурнавай фильм къалурунилай гатIунна. Адалай кьулухъ иштиракчийрин вилик рахай РФ-дин журналистрин союздин РД-да авай отделенидин председатель, «Лезги газетдин» кьилин редактор Мегьамед Ибрагьимова фильм гьазурунай телеканалдин коллективдиз, анин регьбер Камила Гьамзатовадиз сагърай лагьана. «Зи фикирдалди, хъсан, итижлу фильм хьана. 17 декьикьадин къене ам арадал гъанвайбурулай чи баркаллу ватанэгьлидин уьмуьрдин саки вири легьзеяр ачухариз алакьна», – къейдна М.Ибрагьимова.

Вичин рахунра Дагъустандин журналистрин тешкилатдин кьили Вирироссиядин конкурс тешкилдай фикир арадал атуникай ихтилатна ва ам чешнелудаказ кьиле тухунин карда куьмекар гайи республикадин жемиятдинни сиясатдин деятель, машгьур меценат Мамед Абасован тIварцIихъ разивилин келимаяр лагьана. М.Ибрагьимован гафарай малум хьайивал, Алик Абдулгьамидов кучукай юкъуз (26-мартдиз) РФ-дин журналистрин союздин РД-да авай отделенидин правлениди адан экуь къамат эбеди авунин мураддалди журналистрин арада конкурс тешкилдай къарар кьабулнай. Гуьгъуьнлай меслятар хъувурдалай кьулухъ «журналистрин акъажунар» уьлкведин дережада аваз тешкилдайвал хьана.

Санлай къачурла, конкурсдиз 27 касди чпин материалар рекье тунвай. Абурукай 3 – федеральный СМИ-яр, амайбур чкадинбур тир. Жюриди 27-дакай пуд кIвалах, конкурсдин положенидин шартIарив кьан тийизвайвиляй, къимет тагана туна.

«Алик Абдулгьамидов хайи хуьруьн, республикадин, уьлкведин чIехи ватанперес тир, ада датIана халкьдин итижриз къуллугъзавай, жемиятда арадал къвезвай виридалайни тIал алай месэлаяр къарагъарзавай, абур гьялдай рекьер суракьзавай. Гьавиляй адаз вири­да гьуьрметзавай, ам виридаз хуш тир. Адан экуь къамат чи рикIера гьамиша­лугъ яз амукьда. Къенин мярекатди и гьа­къикъат нубатдин сеферда тестикьар­зава», — алава хъувуна М. Ибрагьимова.

Гъалибчийрив шабагьар вахкуниз талукьарнавай мярекатдал Алик Абдулгьамидовакай, адан яратмишунрин рекьикай чпин фикирар Арсен Юсупова, ДГУ-дин филологиядин факультетдин журналистикадин отделенидин электронный СМИ-рин кафедрадин доцент ПатIимат Ибрагьимовади, «Дагестанская правда» газетдин кьилин редактор Бурлият Токболатовади, «Новое дело» газетдин кьилин редактор Гьажимурад Сагитова, «Дагъустан» РГВК-дин генеральный директор Камила Гьамзатовади, рес­публикдин эдебиятдин журналрин кьилин редактор Мурад Агьмедова, Андрей Меламедова, Ханжан Къурбанова, «Да­гъустан» ГТРК-да «Вести» программа тухузвай Хатима Нисредовади, РД-дин МВД-дин пресс-къуллугъдин виликан регьбер Абдулманап Мусаева лагьана.

Къейд ийин хьи, конкурсда 4 номина­ция ава. Гьар са номинациядай 1, 2, 3-чкаяр кьурбуруз дипломарни 50, 30 ва 20 агъзур манатдин кьадарда аваз пулдин пишкешар гана. ИкI, «Печатдин СМИ-яр» номинацияда 1-чка – «Дагес­танская правда» газетдин журналист Тамирлан Мусаидова, 2-чкани гьа и газетдин векил Хасайбат Межидовади, 3-чка «Молодежь Дагестана» газетдин мухбир Шамиль Ибрагьимова кьуна. Иштиракчийри «Сетдин СМИ-яр» номинациядиз виридалайни пара материалар рекье тунвай. Абурукай виридалайни хъсан пудак ногъай чIалал акъатзавай «Яйлахдин сес» газетдин отделдин редактор Мегьамбет-Али Ханов (1-чка), «Мирмол» изданидин векил Анастасия Расулова (2-чка) ва «Дагестанская правда» газетдин векил Мадина Агьмедова (3-чка) акатна. «Телевидение ва радио» номинацияда 1-чкадиз «Дагъустан» ГТРК-дин мухбир Давид Кумаев, 2 ва 3-чкайриз «ННТ» телеканалдин векилар – Белла Агьмедовани Гьамзат Нурмегьамедов лайихлу хьана. «Блогосфера» номинациядай виридалайни хъсанбурун жергеда «Мирмол» изданидин кьилин редактор Тимур Магьомаев (1-чка), журналист, блогер Альберт Эседов (2-чка), РФ-дин журналистрин союздин член, инженер-оператор Ариф Гьамидов гьатна.

Конкурсдиз рекье тунвай материалрин арада Алик Абдулгьамидоваз талукь са макъалани авай. Ам «Лезги газетдин» медениятдинни эдебиятдин отделдин редактор Гьажи Ильясова гьазурнавай «Репортер» тIвар ганвай очерк-интервью тир. Жюридин къарардалди, конкурсдин махсус пишкешни (диплом ва 10 агъзур манат пул) гьадаз кьисмет хьана.

Мярекатдин иштиракчийри Алик Абдулгьамидован экуь къамат эбеди авунин ниятдалди ихьтин конкурс тешкилун хушдиз кьабулна. Мисал яз, Арсен Юсупован фикирдалди, и конкурсди неинки са бажарагълу журналистдин экуь къамат эбеди ийизва, гьакIни республикадин, уьлкведин жуьреба-жуьре регионрин журналистар патал  чпин къуватар алцумдай, алакьунар къалурдай мад са майдан арадал гъанва.

«РенТВ», «Пятый» ва «iz.ru» телеканалрин Кеферпатан Кавказда авай продюсер ПатIимат Имрановади гьисаб­завайвал, Алик Абдулгьамидован экуь къаматдиз бахшнавай «За правду в профессии» конкурс уьлкведин медиадин уьмуьр­да кьиле фенвай лишанлу ва­къиа хьиз кьабулиз жеда. «Зи фикирдалди, «За правду в профессии» конкурсди алай аямдин репортеррин мектебдиз къимет гудай, адан дережа тайинардай мумкинвал тешкилзава. Конкурсдин кьилин шартIни тIал алай месэлаяр къарагъарун, абур гьялдай рекьер къалурун я. Ибур Алик Абдулгьамидован кIвалахдин кьилин яржар тир. Абур давамардай ихьтин конкурсар хьун анжах шадвалдай кар я», – лагьана П.Имрановади.

РФ-дин журналистрин союздин РД-да авай отделенидин председатель М. Иб­рагьимова къейд авурвал, «За правду­ в профессии» конкурс гьар йисуз кьиле тухудай ниятар ава.

Агьмед Магьмудов