Къе Дагъустандин халкьдин шаир, XX асирдин Гомер СтIал Сулейман дидедиз хьайи югъ я. И юкъуз чи республикада Дагъустандин шииратдин югъ къейдзава.

РикIел хкин: 18-май, СтIал Сулейманан хайи югъ, Дагъустандин шииратдин югъ яз къейд авунин фикир гайиди Расул Гьамзатов тир. 2002-йисуз Дагъустандин шииратдин югъ, Сулейманан юбилейдин югъ туширтIани, иллаки гурлудаказ къейднай: Москвадай, масанрай хейлин мугьманар атанай. 18-майдиз писателрин, медениятдин ва гьукумдин векилрин чIехи десте Агъа СтIалдал – Сулейманан хайи хуьруьз мугьман хьанай. Ина шаирдин гьуьрметдай чIехи сувар кьиле фенай.

СтIал Сулейман Дагъустан вири дуьньядиз машгьур авур сад лагьай шаир яз гьисабзава. Расул Гьамзатова са мярекатдал вич Сулеймана машгьур авур Дагъустанда дидедиз хьана лагьанай. Гьакъикъатдани, СтIал Сулейман чIехи шаир тир ва асиррани гьакI яз амукьда.
 
Шииратдин сувар виридаз мубаракрай! Агъадихъ чна куь фикирдиз СтIал Сулейманан «И Къафкъаз» шиир гъизва.
 
И Къафкъаз

Гуьгьуьл начагъ, вич я вердиш
ЧIугваз гьар азар, и Къафкъаз.
Гагь жеда ам саки са лам,
Ялиз гьар са пар, и Къафкъаз.

Сагьибсуз тир кьуру бустан –
Гьадаз ухшар  я Дагъустан.
Гагь жеда ам са гуьлуьстан,
Гагь жеда базар и Къафкъаз.

Гагь бахтлу яз адан йикъар,
Шад яз хъуьрез жеда халкьар,
Гагь жеда чIур адан гьалар,
Жеда бедназар и Къафкъаз.

Гагь адан гьал хьана бейгьуш,
Хъун тавунмаз, жеда сархуш,
Гагь жеда ам хьана аруш
Хифетар, гъамар и Къафкъаз.

Безетмиш жез, гваз дамахар,
Хурал алаз пак булахар,
Гагь авадриз вилин накъвар,
Жеда лап бизар и Къафкъаз.

Гагь алукIиз чекме, шалам,
Гагь куьк, гагь яхун жеда ам,
Гагь Деникин, гагь Бичерух
Жез вичин дустар и Къафкъаз.

Эй Сулейман, аку крар:
Са пад дере, са пад дагълар,
Гагь вилерал жеда накъвар,
ЧIугваз агьузар и Къафкъаз.

«Лезги газетдин» редакциядин коллектив