Диде

 

ГъвечIи чIавуз, кьуна вуна къужахда,

Рагъ хьиз, цавуз хкаждай зун, диде чан.

Дурум гана уьмуьрдиз гьар саягъда,

Ви лайлайри сустардай зун, диде чан.

 

Юкъуз-йифиз гамар вуна храдай,

Инсаф тийиз жегьил чандиз, диде чан.

Гьич датIана билбил мез ви рахадай,

Ви зиреквал чешне тир заз, диде чан.

 

Тербияни, кIанивални, акьул гуз,

Багьа гъед хьиз хвена на зун, диде чан.

Агалкьунар тамамариз гьар юкъуз

Бахтлу сегьер багъишна заз, диде чан.

 

Экуь дуьнья ваз гуьлуьшан хьун патал

Къуллугъ ийиз гьазур я зун, диде чан.

РикIин къене биришар тахьун патал

Гъам-хажалат багъиша заз, диде чан.

 

Гьакъикъатда дидедин тIвар гужлу я,

За ви тIварцIел лянет гъидач, диде чан.

Вун авай кIвал гьамишалугъ нурлу я,

Ви къаматдиз къимет авач, диде чан.

«Лезги газетдин» 2026-йисан 18-нумрадай.