Дидедиз

 

Ширин бала лугьуз, къужахламишна,

Галат хьайла такур гьич кьил галтадиз,

Халкь авуна, заз и дуьнья багъишна,

Темен гана, кьилелай кап алтадиз…

Зун гьайифди кузава вун галачиз,

Шикил гъиле кьуна, шел кваз вилерик.

Лап умудсуз жез вун кIвале авачиз,

Вав рахада, диде, фул кваз гъилерик.

РикIе къамат хуьда за ви гьамиша,

Ихтилатар хъуьрез-хъуьрез ийидай.

Ахварай заз мили са хъвер багъиша,

Гьакъикъатда жедач югъ вун аквадай.

 

Мугьман

 

Нянин бере. КIвалин вилик секуьдал

Ацукьнавай, гъил ченедик кутуна,

Агьил халу серсер хьана суьруьдал,

Вичин лацу кьар рачуник такуна.

Яваш-яваш са кас хуьруьз агъадай

Хкаж жезвай, гъилер юкьвал эцигна.

Ам чаради тир, гьаларай аквадай.

Халу адаз дикъетдивди килигна.

Кьакьан буйдин, жендек кьелечI якIарин,

Са тIимил кьван кIул экъисна къекъведай.

Яшар тамам, рехивал квай чIарарик,

Пекер алай кьери, хуьре тежедай.

«Гьуьрметлуди, ваз и чIаван хийир хьуй! –

Лугьуз, халу къариб къайда рахана. –

Лагь ви метлеб, рикIевай сир чаз чир хьуй.

Вун гьинай я? Низ мугьман яз атанва?»

Рекьин мугьман, пIузаррик хъвер акатна,

Уф алатна, саламалейк лагьана,

Ихтияр къачудай тегьер агатна,

Дарихдаказ ам халудив рахана:

«Зун гъурбатда хьана гъвечIи чIавалай,

Гьич садрани хайи ватан такуна.

Гайиди хьиз артух камал цавалай,

Заз ахварай хайи макан акуна.

ЦIигелдаказ рекье гьатна, хтана,

Акун патал жуван сихил хуьрера.

Гьа икI зун квез мугьман хьана атана, –

Кьил агъузна яваш, сефил хъуьрена. –

Къекъвена зун хуьре, багълар-чуьллера,

Къарасудин михьи ятар дадмишна.

Тарихдикай хьана рахаз кIвалера,

Фикирарни рикIин къастар дегишна.

Чи бубайрин къекъвена зун сурара,

Акуна заз куьгьне мискIин, медреса.

Гила, халу, рекье гьатда гъурбатдиз…» –

Яваш хьана сес, чандик фул акатиз.

Халуди лап дикъетдив яб акална.

«Вуч лугьун, хва, ватан тек я виридаз,

ЧIал хуралай чир хьухь, ктаб акьална,

Гьуьрмет ая чIехидазни гъвечIидаз.

Жуван макан рикIелай гьич алудмир,

Мукьвал-мукьвал са кьил чIугу хьайила.

Вун лезги я, фикирдай гьич акъудмир,

Дагъви лагьай тIвар алай вал хайила».

*  *  *

Экуь чинал пIузар назик хъуьреда,

Зи вах, вун чи хазина я, дамахни.

Мублагь я ви гьар са кIвалах авурла,

ТIебиатни уях я, вун акурла.

Гьар са кIвалах гьисаб кьуртIа авур на,

Зи вах, вун чи хазина я, дамахни.

Гьевесламиш жеда гьар са суьгьбетдал,

Вун гьамиша безетмиш хьуй девлетдал,

Зи вах, вун чи хазина я, дамахни.

Аллагьди ваз къуватар гуй, чанни сагъ,

Гьамиша хьуй кьилел экуь цавни рагъ.

Ви гьар са кам хьуй бегьерлу сални багъ,

Зи вах, вун чи хазина я, дамахни.

*  *  *

РикIик зурзун акатзава,

Къвалав, яр, вун алаз кIан я.

Кьве вил вилик авахьзава,

Хьана ялгъуз, акваз кIан я.

Акъатзавай уьмуьр жуван,

Бахт бинедай галаз кIан я.

Жуван сагъ чан кумир кIубан,

Кьиле мурад аваз кIан я.

Лугьуз мани, чIагай марал,

Аваз-макьам тазаз кIан я.

Юкъуз кьванни чIарар гарал,

Азад макъам къугъваз кIан я.

Карагзава гуьрчег къамат,

Тамарзлу хьун вуч заз кIан я.

Вун пара я, керчек тават,

РикIевай сир жузаз кIан я.

«Лезги газетдин» 2026-йисан 18-нумрдай.