Россиядин Яшайишдин фондунин Дагъустанда авай отделенидин 14 агъзурни 376 муьштериди алатай йисуз пенсиядиз экъечIдалди кIватI хьанвай такьатар (пенсионное накопление) са сеферда гудай пул яз къачунва. А такьатрин кьадар юкьван гьисабдалди 45 агъзур манат я. Идакай чаз идарадин пресс-къуллугъди хабар гана. Такьатар и жуьреда вахчуз жезвайбурук пенсиядиз экъечIун патал кIватI хьанвай пулунин кьадар тIимил тир ва я пенсиядиз экъечIун патал йисарин лазим кьадар стажни пенсиядин коэффициентар авачир ксар акатзава.
РикIел хкин, республикадин агьалияр чпин пенсия гьикI ва квекай ибарат жезватIа гъавурдик кутун патал СФР-дин региондин отделениди адан кьадардиз (накопление) талукь малуматар «Госкъуллугъар» порталда хсуси кабинетдиз ара-ара вегьезва. И малуматдал асаслу яз, гьар са агьалидивай вичин гележегдин пенсиядин кьадар чириз жезва.
Страховой пенсиядилай (2015-йисалди ам гьар вацра гудай пул яз тайинарзава) тафаватлу яз, и такьатар муьштеридиз са сеферда, яни са гъилди гузва. Къенин юкъуз гзаф дагъустанвийри и жуьредикай гегьеншдаказ менфят къачузва: отделенидиз арзаяр рекье твазвай агьалийрин чIехи пай чпихъ тIимил стаж ва такьатарни са сеферда гудай пул яз вахчуз жезвайбур я.
Алай вахтунда кардик квай къайдайралди пенсиядин накопленияр пенсиядиз экъечIзавай виликан яшарин сергьятра аваз тайинарзава. Дишегьлийривай и такьатар 55 йис тамам хьайидалай кьулухъ къачуз жезва, итимривай – 60 йис. Амма пенсиядиз вахт (яшар) тамам жедалди экъечIзавайбурувай абур йисарилай (яшарилай) виликни къачуз жезва. РикIел хкин хьи, пенсиядиз яшар тамам жедалди экъечIун патал 15 йисан стаж ва пенсиядин 30 коэффициент хьун герек я. Амма дишегьлийрин яшар 55-далай ва итимринни 60-далай алатайла, коэффициентар ва стаж аваз хьун истемишзавач. Пенсиядин накопленияр са сеферда гудай пул яз къачун патал арза гун лазим я. Абур чеб-чпелай тайинарзавач. Арза «Госкъуллугъар» порталда хсуси кабинетда, МФЦ-да ва я Яшайишдин фондунин Дагъустанда авай отделенидин муьштерийрихъ галаз кIвалахдай къуллугъра гуз жеда. Са сеферда гудай пулдин такьатар абур къачун лазим тир кас рагьметдиз фейи дуьшуьшда адан ирсдаррив агакьарда.
Эгер пенсиядин накопленияр гьукуматдинди тушир фондуна кIватI жезваз хьайитIа, арза аниз гун лазим я.
Рагнеда Рамалданова
