И йикъара КIирийрин хуьре, Совет­рин Союздин Игит Эсед Салигьован экуь къаматдиз бахшна, волейболдай республикадин 54-турнир кьиле фена. Ана Ахцегь, Кьурагь, Мегьарамдхуьруьн, Хив, СтIал Сулейманан районрай ва Дербентдай атанвай итимрин хкянавай командайри чпин устадвал къалурна. Турнирдин гьуьрметлу мугьманрин арада спортдин «Волейбол» телеканалдин журналистарни авай. Абуру Дагъустандин волейболдин тарихдикай ва ам вилик финикай документальный фильм гьазурзава.

Акъажунар, адет хьанвайвал, Игит рикIел хуьнин митингдалди ачухна. Турнирдин иштиракчияр райондин администрациядин тIварунихъай тебрикна. КIирийрин школа-интернатдин директор Надир Тагьирова райондай Ватандин ЧIехи дяведиз 5 агъзурдалай виниз агьалияр фейиди, абурун арадай Араз Алиев ва Эсед Салигьов Советрин Союздин Игит лагьай тIварцIиз лайихлу хьайи­ди­ рикIел хкана. Фашистрихъ галаз дяведа гъалибвал къазанмишун патал Советрин халкьди къалурай кьегьалвилер рикIелай алуд тавун, абур несилрилай несилрал агакьарун чи виридан буржи тирди къейдна.

Къугъунрин нетижада Дербентдин волейболистар 1-чкадиз лайихлу хьана. Хив райондай тир «АрхитI» ва Кьурагь райондин командайри, талукь тирвал, 2 ва 3-чкаяр кьуна. Камил Мусаев (Кьурагь), Гьамзат Расулов (Дербент), Фарид Ягъибегов (Хив) ва Хейруллагь Алияров (Ахцегь) турнирда виридалайни хъсандиз къугъвайбур яз гьисабна.

***

Са шумуд югъ идалай вилик Ахцегьа, дяведин махсус серенжемда телеф хьайи аскеррин экуь къаматриз бахш­на, Россиядин Игит Энвер Набиеван пишкешар патал азаддаказ кьуршахар кьунай жаванрин (2009-2011-й.) арада республикадин 3-турнир кьиле фена.

Райондин кьил Абдул-Керим Палчае­ван тIварунихъай депутатрин собранидин­ председатель Гьажимурад Парпачева­ спортсменриз, тренерриз ва тамаша­чий­риз спортдин мярекат тебрикна, халис­ дагъвийри чпин гьунарар, гьасиррал хьиз, ватандин итижар хуьнин кардани къалурзавайди, и серенжем ватан патал чанар гайибурун экуь къаматриз бахшнавайди­ къейдна. Мярекатдал рахайбурун арада Россиядин Игит Э. Набиеван буба Альберт Набиевни авай. Ада жаванрихъ гьам бедендин, гьамни руьгьдин­ къуватлувал хьун алхишна, ислягьвал патал чанар­ къурбанд авур ксар ри­кIе­лай ракъур тавун важиб­лу­ тирди къейдна. СВО-дин иштиракчийрин тIва­ру­­нихъай турнирдин тешкилатчийриз Ахцегь районда «Память гор» ДРОО-дин председатель Радик Вагьабова сагърай лагьана. Ихьтин серенжемрихъ еке важиблувал авайди къейдна.

Гуьгъуьнлай республикадин шегьеррайни районрай атанвай жаван спортсменри заланвилин 10 категориядай гьасиррал чпин устадвал къалурна.

***

10-майдиз СтIал Сулейманан райондин Сардархуьруьн спорткомплекс­да дзюдодай кьиле фейи республикадин турнирда 2008-2010-йисара дидедиз хьанвай 100-далай виниз жаванри иштиракна.

Ам ачухуниз талукьарнавай шад мярекатдал ИМЦ МКУ-дин кьилин пешекар К. Аминов, дзюдодайни самбодай 3-нумрадин ДЮСШ-дин директор, дуьньядин са шумудра чемпион Тельман Къурбанов ва масабур рахана, ихьтин серенжемри ­республикадин спортсменрин дуст­вилин алакъаяр мягькемаруниз, жаван спортсменрин устадвал хкажуниз куьмек гузвайди къейдна. Къизгъин бягьсерин ­нетижада гъалибчиярни майдандиз ­акъатна.

Рагнеда Рамалданова