Дуствилин алакъаяр хьана кIанзавач

РагъакIидай патаз Юкьван Азиядихъ галаз Россиядинни­ Китайдин къени алакъаяр хьун бегенмиш туш. «РИА Новос­ти» чешмеди хабар гузвайвал, идакай РФ-дин МИД-дин векил         А. Стер­ника ихтилатна.

«Амадагрилай чахъ галаз алакъаяр хуьз алакьзава. Амма, лагьана кIанда, и кар РагъакIидай патан уьлквейри ийизвай акси­вилерин, кьуьруькрин шартIара кьиле физва…» – лагьана ада.

РФ-дин МИД-дин кьилин заместитель Михаил Галузина­ ­международный дискуссиядин «Валдай» клубди тешкилай­ ­Юкьван Азиядин VI конференциядал малумарайвал, Рагъ­акIи­дай патаз Юкьван Азия Россиядиз къурхуяр гудай майдандиз элкъуьриз кIанзава.

Къадагъаяр къуватда тазва

Япониядин МИД-дин кьил Т. Мотэгидин фикирдалди, Токиоди, хсуси милли итижар фикирда аваз, Россиядихъ галаз талукь саягъда алакъаяр хуьн важиблу я. Адан гафар «РИА Новости» чешмеди раижнава.

Япониядин гьукуматдин чиновникар майдин эхирда Россия­диз финикай авай хабаррикай вичин фикир лугьудайла Мотэгиди къейдна хьи, Токиоди Москвадиз акси яз малумарнавай санкцияр къуватда тазва.

2022-йисалай инихъ сифте яз Япониядин чIехи тешкилат­рин векилар гьукуматдин бизнес-макьсадар гваз Россиядиз фидайдакай апрелдилай инихъ «Киодо» агентстводи са шумудра хабар ганай.

Махсус серенжемдикай

Женгер акъвазарай, ислягьвал малумарай йикъарикай менфят хкудуналди, ВСУ-ди кар алай частар чинеба Харьковдин мулкариз акъудна. Идакай дяведин пешекарди ихтилатна. Адан гафаралди, спецназ ва маса уьлквейрай гьакъидихъ кьунвай аскерар Харьковдин мулкариз акъудуналди, Украинадиз «Курскдин сценарий» тикрар хъийидай къастар ава.

Къейд ийин, 9-11-майдиз ислягьвал малумарнавай. Россиядин оборонадин министерстводи къейд авурвал, Яракьлу Къуватри СВО кьиле физвай мулкара малумарай къайдадал кIевелай амална. Гьа са вахтунда ВСУ-ди беспилотникар ахъа­юнин, СВО кьиле физвай чкайра РФ-дин Яракьлу Къуватрин, гьакIни гьар жуьре регионра ислягь агьалийрин объектар ягъу­нин гьерекатар давамарна. Ведомстводи 11-майдиз малумарай делилралди, Украинади ислягьвилин икьрар чIурай 23802 дуьшуьш дуьздал акъудна.

Хантавирус пайда хьуникай

ВОЗ-диз хантавирус гегьеншдиз чкIиз башламиш хьунин лишанар аквазвач. Идакай «ТАСС» чешмеди хабар гузва.

Виридуьньядин здравоохра­не­нидин тешки­лат­дин­ кьил И.А. Геб­рейесуса къейд­на­вайвал,  гьалар де­гиш хьунни мумкин я. Адан фикирдалди, и вирусдикди начагъ жедайбурун кьадар мукьвара артух жедач лагьана тестикьарун четин кар я, гьикI хьи, вирусдин инкубациядин муддат яргъалди давам жезва.

США кумукьнава

Ирандин регьбердин меслятчи А. Велаятиди къейднавайвал, женгерин майданда Иран США-дин винел гъалиб хьана, гьавиляй Д. Трампавай Пекиндиз шад гьалара, узягъдиз физ жедач. Идакай 12-апрелдин экуьнахъ «Tasnim» чешмеди хабар гана.

Сиясатчидин фикирдалди, Трампа дипломатвилин рекьяй гъалибвилерик умуд кутунихъ са файдани авач.

Яракьар энгеларзава

Артиллериядин ракетайрин «HIMARS» комплексар патал герек затIар агакьарун США-ди энгеларзава лугьуз, Эстониядин гьукумдарри арза-ферзе ийизва. Идакай «РИА Новости» чешмеди хабар гузва.

«Къе, гьайиф хьи, ахьтин гьалар арадал атанва хьи, Ирандихъ галаз жезвай гьерекатар себеб яз, США-ди «HIMARS» комплексар патал герек боеприпасар ракъурун акъвазарнава», – лагьанва Эстониядин оборонадин къуватрин командующий А. Мерилоди.

Къейдзавайвал, герек затIар гъун энгеларунилай гъейри, абурун къиметарни багьа хьанва. Бязи чешмейри хабар гузвайвал, Ирандихъ галаз хьайи къалмакъал себеб яз, Америка яракьрин жигьетдай зайиф хьанва ва гьавиляй анин кьиле авайбуру асул фикир чпин хсуси жебехана ацIур хъувуниз гузва.

«Лезги газет»