Къе, 1-майдиз, яргъал йисара «Лезги газетдин» редакцияда кIвалахай лезгийрин машгьур публицист, гьикаятчи, Дагъустандин журналистикадин агъсакъал Казим Казимован 90 йис тамам жезва.

Баркаллу юбилей мубаракиз Казим Мегьамедшерифовичан кIвализ кьиле «Лезги газетдин» кьилин редактор Мегьамед Ибрагьимоваз авай журналистрин са десте мугьман хьана. Ачух рикI, къени къилихар авай агъсакъалди вичихъ галаз санал кIвалахай юлдашар хушдиз, багьа мугьманар хьиз кьабулна.

Мегьамед Ибрагьимова Казим Мегьамедшерифовичаз вири редакциядин коллективдин патай 90 йисан юбилей мубаракна, адахъ чандин сагъвал, руьгьдин кIубанвал, яргъи уьмуьр хьун алхишна ва баркаллу юбилейдин сагьибдив Гьуьрметдин грамотани пулдин пишкеш вахкана.

Вичин нубатда Казим Казимова вич рикIелай алуд тийизвай хайи коллективдихъ тIварцIихъ разивилин келимаяр лагьана, «Лезги газет» гьар са рекьяй вилик фин вичин эрзиман мурад тирди къейдна.

Гуьгъуьнлай ихтилатар жуьреба-жуьре тIуьнривни няметрив ацIанвай суфрадихъ давам хьана. Казим Казимова редакцияда кIвалахай йисар рикIел хкана, къелемдин дустариз камаллу агъсакъалдин патай къиметлу насигьатар гана. Гуьруьш рикIел аламукьдай шикил ягъуналди акьалтIна.