Юбилей

И мукьвара Кьасумхуьруьн культурадин имаратда Дагъустан Республи­кадин культурадин лайихлу работник Къазибег­ Къурбанован яратмишунрин межлисни 70 йисан юбилей шад гьалара къейдна.

Ана СтIал Сулейманан район­дин кьил Саид Темирханова, адми­нистрация­дин къуллугъчийри, яратмишунардай ин­теллигенциядин векилри, культурадин ва образованидин хилера кIвалахзавай ксари, къунши районрай атанвай гьуьр­метлу мугьманри, гьакIни дустари ва багърийри иштиракна.

РГВК-дин «Вахтар ва инсанар» передача тухузвай шаир Владик Батманова юбилярдин уьмуьрдинни яратмишунрин рекьикай суьгьбетна.

Къурбанов Къазибег  Шу­курбегович Кьурагь­ рай­­­­ондин Кьуьчхуьррин­­ хуь­ре дидедиз хьана­. Ана 8-йисан школада­ кIел­­­­на.­­   1972-йисуз­ Дер­бент­да­­ ачух­на­вай му­зы­кадин­ училищедик­ экечI­на. Кьве курс акьал­тIа­райла, адаз Советрин Армия­дин жергейриз эвер­на­. 1975-йисуз Армиядай­ хта­на, ада музыкадин­ учи­­­лищеда кIелун дава­­­марна. 1978-йисуз анаг акьал­тIарна, клар­нетдай ­­­­ тарсар гудай муаллим­­­ви­лин пешедин­ иеси­ хьа­на. Хъсан чирви­лер­ аваз учи­ли­ще акьалтIарай ам кIвалахиз Кьа­сум­­хуьруьн­ музыкадин школадиз­ ра­къурзава. Ина кIвалахай са йисалай­­ райондин кьиле авай ксари ам школадин директорвиле тайи­нарна­. КIва­лахдивай къерех тахьана­, ада 2007-йисуз Дербентдин искусст­водин­ни культурадин институтни акьал­тIар­на. 1979-йисалай цIинин январдалди ада школадиз регьбервал ­гана.

И йисара адалай школа неинки хуьз, виликни тухуз, гьакIни яратмишунардай тегьерда кIвалахдай, сад хьтин фикиррал алай пешекар муаллимрин коллективни арадал гъиз алакьна.

Райондин музыкадин школа 1987-йисуз Москвада кьиле фейи Ви­рисоюздин халкьдин яратмишунрин 2-фестивалдин лауреат хьана­. Муз­школада кIелай 9 кас, вузар акьал­тIарна, кIвалахиз чпин хайи школадиз хтанва.

Райондин кьиле авайбурун куьмекдалди 1991-йисалай музшколадин филиалар Вини СтIалдал, Курхуьрел, Герейханован 2-отделенида, ЦIийи Макьа, ДаркIуш-Къазмайрал ачухна.

Школадиз регьбервал гайи йисара Къазибег Шукурбеговича вич кар алакьдай, теориядай хъсан чирвилер авай, алай аямдин идара авунин къайдаяр ишлемишиз чидай тежрибалу муаллим ва регьбер яз къалурна.

Къазибег Шукурбеговичан пешекарвилин ва муаллимрин гьакъисагъ зегьметдин нетижада райондин аялрин музыкадин школа рес­пуб­ликадин алава образованидин идарайрин арада йигин камаралди вилик физвайбурун жергеда гьатна. Ам са шумуд йисуз райондин культурадин отделдин экспертрин составдиз ва культурадин отделдин муаллимрин аттестация тухудай экспертрин дестедиз хкяна.

Яргъал йисара чIугур гьакъисагъ зегьметдай, культура вилик тухунай ва яшайишдин месэлаяр гьялуник пай кутунай Къ. Къурбанов Россиядин культурадин работникрин профсоюздин ЦК-дин Президиумдин Гьуьрметдин грамотадиз лайихлу хьана.

Райондин кьиле авайбуру ина ­кьиле физвай вири мярекатра актив­нидаказ  иштирак  авунай,  акьалтзавай несилдиз музыкадинни гуьзелвилин (эстетикадин) тербия гуник­ чIехи пай кутунай ва гьакIни школадин аялри къазанмишнавай агалкьунриз килигна, Къ. Къурбанован ва кол­лективдин зегьмет са шумудра шабагьар гуналди къейдна. Респуб­ликадин вилик ла­йихлувилерай РД-дин Госсоветдин къарардалди Къазибег Шу­курбегович­  Дагъустан  Республикадин культурадин лайихлу работник лагьай гьуьр­метдин тIварцIиз лайихлу хьанва.

РД-дин культурадин министерстводин кIелунринни методикадин центради музшколадиз, акьалтзавай несилдиз руьгь кутадай чирвилер ва хъсан тербия гуз, яргъал йисара гьакъисагъ зегьмет чIугунай грамота ганва.

Къазибег Шукурбеговича «Рычал»­ тIвар алай ансамбль арадал гъана­, адаз регьбервал гана. Ансамблдин­ тIвар-ван Дагъустандиз чкIа­на. Да­гъус­тандин халкьдин артист Суьлгьия ­Гьа­жиевадихъ­ ва маса манидаррихъ галаз са шумуд концертни кхьена. Къени адан коллективдиз шад мярекатар кьиле тухуз эверзава.

Районда, республикада гьуьрмет, авторитет авай пешекар хьиз, Къурбанов хъсан хизандин кьилни я. Ада уьмуьр­дин юлдаш рагьметлу Марал Зугьумовнадихъ галаз санал вад велед чIехи ­авуна.

Межлисдиз кIватI хьанвайбурухъ ­эл­къвена рахай райондин кьил Саид­ Темирханова Къазибег Къурбанован­ ярат­мишунрин агалкьунар къейдна­, му­­зыкадин культура вилик тухуник кутунвай паюниз еке къимет гана, адахъ мягькем сагъламвал ва яргъи уьмуьр хьун алхишна. Яргъал йисарин гьакъи­сагъ зегьметдай ва музыкадин искусство вилик тухуник еке пай кутунай ада юбилярдив гьуьрметдин грамота вахкана.

Мергьяматлувилин «Умуд» фондунин директор Савин Велиева, яргъал ­йисара культурадинни образованидин хиле чIугур гьакъисагъ зегьмет къейд авуналди, юбилярдиз пулунин пишкеш гана.

Аялрин искусствойрин школадин директор Бажихалум Меликовади юби­лярдин гьакъисагъ зегьметдиз еке къимет гана, Къ. Къурбановав РД-дин культурадин министерстводин патай Диплом ва вичин коллективдин патай шабагь вахкана.

Юбилярдин тIварунихъ тебрикдин чими келимаяр лугьуналди адан дус­тар, вилик йисара райондин жавабдар къуллугърал зегьмет чIугур Лацис Оружев, Алимет Мейланов, гьакI РД-дин халкьдин шаир Сажидин Саидгьасанов, «Куьре» культурадин центрадин регьбер Агьмедпаша Агьмедпашаев, машгьур манидарар тир Фаризат Зейналова, Таира Муспагьова­, Омар Меликов, ашукь Айдун, Гуьл­мира Алиева, Кевсер Фейзулаева, чIа­гъанчи Надир Тагьиров ва масабурни рахана.

Рахунрин арайра Кьасумхуьруьн аялрин яратмишунрин кIвалин аялри кьуьлер авуна, манидарри, «Эксклюзив» ва «Созвездие» дестейри концертдин вижевай программа гана.

Яратмишунрин межлис, зегьметдиз лайихлу къимет гайи сувар хьиз, гзаф шад гьалара кьиле фена.

Къагьриман  Ибрагьимов