Дуьньяда тIебиатдин адетдин гьаларилай тафаватлу жезвай чкаяр гзаф ава. Антарктидада авай «Ивидин» чарчарни гьахьтинбурун жергедай я.
Гьелбетда, гьакъикъатда ам ивидинди туш, ихьтин тIвар адал цин ранг яруди хьуниз килигна акьалтнава. Тейлора муркIадин гьамбаррикай ва Кьуру дередай авахьзавай яд яруди хьунин себеб, пешекарри тестикьарнавайвал, ихьтин надир чкада авай цик ракьун оксид гзаф кваз хьун я. Чарчардин чешме 400 метрдин кьакьанвал авай муркIари кIевирнавай вир я. Вирин цик океандин целай кьуд сеферда артух кьел ква, гьавиляй ам гьатта 10 градусдин аяздини муркIадиз элкъуьрзавач.
Яру рангунин яд акъатзавай чка сифте яз 1911-йисуз Австралиядай тир геолог Г. Тейлора раижна.
«ЛГ»
