Махачкъалада 27-апрелдиз Россиядин МЧС-дин Дагъустанда авай кьилин управленидин базада Россиядин МЧС-дин гражданский оборонадин ва агьалияр хуьдай департаментдин директор Олег Мануйлодин регьбервилик кваз Дагъустан ва Чечен респуб­ликайра арадал атай бедбахтвилин чIуру нетижаяр алудунин рекьяй межведомственный оперативный штабдин заседание кьиле фена.

Мярекатда СКФО-да РФ-дин Президентдин патай тамам ихтиярар авай ве­килдин заместитель Мегьамед Рамаза­нова, РД-дин Гьукуматдин Председатель Абдулмуслим Абдулмуслимова­, ви­це-премьер Рамазан Жафарова, гьакI ВКС-дин режимда аваз Роспотреб­над­зордин, Росгид­рометдин, эцигунрин­, здраво­ох­ра­ненидин­­, просвещенидин, транспортдин, энер­гети­кадин, хуьруьн майишатдин, ре­къем­рин ми­нистерст­войрин, цин ресурсрин, тех­над­зордин векилрини иштиракна.

РД-дин Гьукуматдин Председателдин заместителди малумарайвал, къенин юкъуз республикада ци басмишнавай кIва­лер ва хсуси майишатар амач. Хасав­юрт районда майданар лиледикай михьунин кIвалахар давамарзава. Цик акатнавай 19 агъзур кIвал ахтармишнава.

«Алай вахтунда кьетIен гуьзчивилик­ кьвалар уьцIезвай дагъдин районар ква. Махсус дестейри 19 агъзурдалай виниз­ кIвалер ахтармишнава. Виликамаз кьун­вай делилралди, 7 агъзур кIвализ жуь­реба-жуьре зиянар ганва», – лагьана Рамазан Жафарова.

Бедбахтвилик акатнавай агьалийриз яша­йишдин рекьяй куьмек гуниз талукь яз РД-дин зегьметдин ва яшайишдин рекьяй хуьнин министр Мегьамедзагьид Кихасурова хабар гайивал, 27-апрелдал­ди агьалийриз ганвай умуми пулуни 345 миллион­ манат тешкилзава. Пулар 8190 касдиз ганва.

Дагъустанда галаз-галаз марфар къу­­никди арадал атай четин гьаларай экъечI­завай гьалдикай РД-дин эцигунрин­, архитектурадин ва ЖКХ-дин министрдин сад лагьай заместитель Салам Гасайниева ихтилатна. Ада малумарайвал, Махачкъаладин, Каспийскдин, Избербашдин­, Буйнакскдин, Дагъустандин­ Огнидин, Дербентдин, Къизлярдин, Юж­но-Сухо­кумск­дин ва Хасавюртдин агьалияр, ара атIунар авачиз, хъвадай целди таъминарзава.

Махачкъала шегьерда Тарнаирка вацI михьунин серенжемриз манийвал гузвай законсуздаказ эцигнавай эцигунар алудзава. Гзаф марфар къуникди вацI алахьна ва къваларив гвай вири майданар ци басмишна.

Алай вахтунда шегьерда бедбахтвилин  зиянар алудзавай гьалдикай  Махачкъаладин администрациядин кьилин сад лагьай заместитель Нариман Батырбиева малумарна.

Ада къейд авурвал, Акушинский проспектда авай шегьердин сурар тамамдиз ахтармишна. Ахтармишнавай кIва­лерин иесийрин 50 процент умуми­ кIвалахдиз манийвал гузвай кIвалер, ше­гьердин куьмекни галаз гуьгьуьллувилелди вахчунин меслятдал атанва.

«И йикъара са жерге объектар чу­кIур­да ва михьда, техникадиз фидай ва кIва­лахдай мумкинвилер яратмишда. Гьа са вахтунда цик акатнавай чкайрай зирзибил­, лил акъудзава», – лагьана Н. Батырбиева.

ВацIарин, хуьлерин, кIамарин къерехар михьунин кIвалахдал Дагъустандин тIебиатдин ресурсрин министерстводин­ пешекарарни машгъул я. Гележегда ятар алахь тавун патал кIамар физвай чкаяр деринарда.

Мярекатдал бедбахтвили гзаф зия­нар гайи районрин кьилерни рахана. Дербент райондин администрациядин кьил Эльман Аллагьвердиева малумат гайивал, алатай гьяд йикъара Россиядин МЧС-дин Дондин дестеди Мамедкъалада чпин вилик эцигнавай хейлин везифаяр кьилиз акъудна.

«Майданар герексуз гзаф шейэрикай михьна, дезинфекция авуна, кIвалерин дараматрин подвалар кьурурна. Хейлин куьчеяр амукьайрикай михьна, зиянар ганвай яшайишдин кIвалер, участокар ахтармишунин кIвалах давамарзава», – лагьана Э. Аллагьвердиева.

Хасавюрт райондин администрациядин кьилин везифаяр вахтуналди тамамарзавай Багьаудин Мамаева къейд авурвал, районда 750 кIвалел атанвай­ гьал ахтармишнава. Абурун са пай бине­дилай ремонт хъувуна кIанзава. Яд акьалтуни зиянар ганвай хейлин кIвале­риз талукь документар авач. Аксай ва Акташ вацIарни кьиляй-кьилиз михьна­ кIанзава. Селлер атайдалай кьулухъ ва­цIар физвай кьерера тарар, кул-кусар ама.

СКФО-да Президентдин патай тамам ихтиярар авай векилдин заместитель Мегьамед Рамазанова куьчеяр, май­да­нар михьдай техника бес тежезвайдакай лагьана.

Багьаудин Мамаева жаваб гайивал­, алай вахтунда алава техника герек къвезвач. Гьар юкъуз кьуд хуьруьн майданар михьунал 15-далай 18-дал агакьдалди техника ва 350 кас машгъул я.

Мярекатдал веревирд авур месэлайриз талукь яз са жерге тапшуругъар гана.

Хийир Эмиров