Дармандин набататар
Шикилдай аквазвай цуьквер (ромашка) течидайбур бажагьат жеда. И набатат чуьллера, эчIелар жедай чкайра экъечIда. Пешекарри теклифзавайвал, дармандин еринда абур цуькведа авай чIавуз кIватIун лазим я – июлдиз. И вацра абурун «зинбилдин» къерехра авай цуьквер тамамдиз ахъа жезва, юкьва авайбур кIурукIда амукьзава.
ЧIутран цуьквер са шумуд жуьрединбур ава. Аптекайра жезвай дармандин чIутран цуьквер чуьлдин маса жуьрединбурулай тафаватлу ийизвай кьилин лишанрикай сад дармандинбурухъ гзаф атирлу ни (дигмиш хьанвай ичерин хьтин) хьун я.
Дармандин макьсаддалди кIватIзавай цуьквер дезинфекция ийидай такьат хьиз ишлемишиз жезва. КIватIнавай цуьквер, гзаф гъвел-гъвел тежедайвал, са шумуд сеферда мукъаятвилелди какадариз, хъсан шагьвар къекъвезвай чкада кьурурзава. Пешекарри къейдзавайвал, и набататдикай ратарин, хуквадин азарар авайла менфят къачузва. ЧIутран цуькверикай маса макьсадар авазни хийир къачуз жезва. Амма эвелни-эвел духтуррал, пешекаррал алукьун важиблу я. Бязи дуьшуьшра чIутран цуьквери агъургъан акьалтунал гъун мумкин я.
«Лезги газет»
