Шегьеррилай элячIна фидайвал

Упрдор «Кавказ» компаниядин Дагъус­танда авай филиалдин директор М. Исаева Хасавюрт, Дербент, Махач­къала­ шегьеррилай элячIна фидай рекьер туь­кIуь­рунин проектар кьилиз акъудунин жигьетдай баянар гана. Адан гафаралди, винидихъ вичикай ихтилат физвай пуд рехъ 2028-йисуз акьалтIарун пландик кутунва.

Кьилди къачуртIа, Хасавюртдилай элячI­на фидай Р-217 «Кавказ» автомобилрин рекье 12 километрдин участокда жуьреба-жуьре кIвалахар кьиле тухузва.

Дербентдилай элячIна фидай рекьикай рахайтIа, са жерге серенжемар кьилиз акъудзава. Инженерный коммуни­кацияр эцигунин кIвалахар давамарзава: газдин, цин турбаяр, алакъадин кабелар ва электроэнергия агакьардай линияр.

Р-215 «Астрахань – Кочубей – Къизляр – Махачкъала» автомобилрин рекьин Махачкъаладин кеферпата элячIна фидай рекьин участокда машинар фин артухарун патал рекьин винелай фидай чка туькIуьрун (путепровод) пландик ква. Апрелдин эхирда экспертизадин разивилин къарар къачудайвал я. Эцигунринни монтаждин кIвалахрив 2026-йисан пуд лагьай кварталда эгечIун ва а серенжемар Алмало-Тюбе рекьин учас­ток цIийикIа туькIуьр хъувунилай (реконструкция) гатIунун пландик кутунва.

Куьмекдин пулар ганва

РД-дин вице-премьер А. Магьмудова республикада селлер атунин нетижада зиянар хьайибуруз яшайишдин куьмекар гуниз талукь махсус мярекат кьиле тухвана.  Идакай «Дагъустан» РИА-ди хабар гузва.

Чешмедин малуматралди, зиянар хьайи 1283 агьалидиз республикадин бюджетдай 45 миллион манатдин кьадарда аваз пулдин такьатар ганва.

Кхьизвайвал, зиянар хьайи ксарикай тамам информация агакьар тавунвай муниципалитетрин кьилерал Магьмудова и кIвалах тади гьалда кьилиз акъудун тапшурмишна.

Игьтияж артух хьанва

Гатфар алукьуникди Дагъустанда эцигунрин кIвалахрик гьерекат акатнава: компанийри абурун кьадар артухарзава. И карди тайин рекьерай хъсан пешекаррихъ, гьакIни эцигунардай техникадихъ авай игьтияж артух хьунал гъизва. Ихьтин фикирдал «Авито Спецтехника» ва «Авито Подработка» сервисрин экспертар атанва, — хабар гузва «Дагъус­тан» РИА-ди.

Чешмедин къейдерин гъавурда­ акьазвайвал, «Авито Подработка» сер­висдин­ делилралди, Дагъустанда­ 2026-йисан 1-кварталда бизнес-за­каз­чикри, алатай йисан и муддатдив ге­къи­гайла, эцигунардайбуруз ва ремонтар ийидайбуруз (час­тичная занятость) теклифунин дуьшуьшар 70 процентдин гзаф хьанва. Кар кьилиз акъудзавайбуру лагьайтIа, ихьтин тек­лифриз жаваб гунин кьадар 11 процентдин виниз акъат­нава.

Къейдзавайвал, эцигунрин хиле гзаф­ни-гзаф игьтияж авай пешекаррин арада сварщикар (игьтияж 168 процентдин артух хьанва) ва монтажникар (+74 процент) ава.

Зирзибилдиз ­талукь яз

Дагъустанда селлер атайдалай кьулухъ кIватI хьанвай кьван пластикдин затIар хийир къачун патал гьялда (утилизация). Идакай РД-дин тIебиатдин ресурсрин ва экологиядин министерстводин телеграм-каналди хабар гузва.

Чешмеди къейдзавайвал, ведомстводи республикадин муниципалитетра селлер атайдалай кьулухъ кIватI хьанвай гзаф кьадар зирзибил, гьа гьисабдай яз пластикдин къапарни, хийир къачун патал гьял хъувун тешкилун къалурнава.

Селлерин чIуру нетижаяр арадай акъу­дунихъ галаз алакъалубурун арада чпин кьадар гзаф хьанвай пластикдиз талукь месэлани ава. Вахтуналди инсанар акъвазнавай чкайрани и зирзибил пара хьанва, гьикI хьи, анриз къапара авай ятар тухвана.

Сифтегьанбурун жергейрай яз, и мес­эладин патахъай къалабулух журналистри, общественникри, блогерри къара­гъарнай. «Чна, гьелбетда, и месэладиз дикъет тагана тадач», — лагьана министрди.

Агьалияр яшамиш жезвай са жерге чкайра пластик кIватIун патал махсус пунктар тешкилда. КIватIай къапар гуьгъуьн­лай гьялун патал талукь тир цехдиз рекье ­твада.

Чешмеди раижзавайвал, и серенжемди тIебиат чиркин хьунин вилик пад ­кьада.

Гьазурайди – Муса  Агьмедов