Дагъустанда къати марфар къунин нетижада арадал атай гьалар гьеле пайгардик акат хъувунвач. Виридалайни пара зиянар хьанвай муниципалитетрин арада Махачкъала шегьер, Хасавюрт ва Дербент районар ава. ТIебиатдин завалдик 6 кас телеф хьана, 200-дав агакьна инсанар къутармишна.
Къати марфарик чпин кIвалериз, хуьруьн майишатдиз, эменнидиз зиянар хьанвай дагъустанвийрин кьадар 10 агъзурдав агакьнава. И бедбахтвили неинки са чи республикадин, гьакIни къецепатан регионрин агьалиярни садна. Гзафбуру зиянар хьанвайбуруз захавилелди куьмекар гузва. Абурун арада РД-дин Халкьдин Собранидин депутат Имам Яралиевни ава.
Имам Яралиева яд акьалтунин нетижада зиянар хьанвайбур патал, санлай къачурла, 6 миллион манат пул чара авунва. И такьатрикай 2 миллион манат хъвадай яд къачуниз харжна. Идакай вичин телеграм-каналда РФ-дин Госдумадин депутат Хизри Абакарова хабар гана.
Ада гьакIни къейд авурвал, Имам Яралиева Дербентдин къеледин мулкара археологиядин рекьяй ахтармишунар кьиле тухуниз 250 миллион манат пул чара авуна. Идалай гъейри, РД-дин Халкьдин Собранидин депутатди Дербентда «Патриот» тIвар алай паркуна «СВО-дин Игитрин Аллея» арадал гъуниз вичин патай 8 миллион манат пул чара авуна. Къуй чи жумарт ватанэгьлидин садакьаяр Аллагьди кьабулрай!
Чи мухбир
