Вичиз гьахълудаказ шаиррин хуьр лугьузватIани, Агъа СтIалрилай машгьур алимар, чIехи дережайрин гьакимар, маса машгьур ксарни акъатна. Шаир Алирза Саидован «Арифдаррин муг СтIалар» шиирда «Баркаван чил – Куьре магьал, Берекатрин кIватI я зур. Ви гьар велед я са кьакьан Уьзягъ ийир Ватан зурба» цIарар хьун дуьшуьшдин кар туш. И хуьряй акъатай, Ватан уьзягъ ийизвай кьегьал рухвайрикай сад машгьур спортсмен, боксёр Селимов Альберт Шевкетович я.
Вичикай неинки Дагъустанда ва Россияда, гьакIни виридуьньяда машгьур боксёр хьайи Альберт Селимов Агъа СтIалдал 1986-йисан 5-апрелдиз дидедиз хьана. Боксдал ам гьеле школада кIелзавай йисара машгъул жез эгечIна. Альберта рикIел хкиз хьайивал, адакай 5 сеферда школадин чемпионни хьанай.
Гуьгъуьнин йисара А. Селимова спортдин рекье дирибашдаказ виликди камар, чIехи дережаяр къачуна. ИкI, чи баркаллу районэгьлидикай 2005-йисуз Россиядин чемпионатдин 2-призер, 2006, 2007, 2009 ва 2011-йисара Россиядин чемпион, гьакIни дуьньядин Кубокдин финалист (2006-йис), дуьньядин чемпион (2007-йис), дуьньядин Кубокдин гъалибчи (2008-йис), дуьньядин чемпионатдин призер (2009-йис), 2006 ва 2010-йисара Европадин чемпион, 2015-йисуз Бакуда кьиле фейи Европадин къугъунрин гъалибчи, Россиядин спортдин лайихлу мастер хьана. Альберт Селимова гъалибвал къачур ва приздин чкаяр кьур Вирироссиядин ва международный кесерлу турниррин ва чемпионатрин кьадар мадни гзаф я. 20 йисан яшда аваз Альберт Селимовакай Россиядин хкянавай командадин член хьана – им лап чIехи агалкьун, чи районэгьлидин зурба бажарагъ къалурзавай лишан я.
А. Селимова вичин тренеррин тIварарни дамахдивди кьазва, вичин агалкьунар абурун дурумлу зегьметдин нетижа тирди къейдзава. Махачкъалада адан сифтегьан тренер Арсен Ибрагьимович Хасаев тир. Альберта адан гъилик са шумуд йисуз вердишвилер къачуна ва устадвал хкажна. Гуьгъуьнлай А. Селимова боксдин «сирер» Каспийскда Россиядин лайихлу тренерар тир Нури-Паша Талибован ва Абдулмуталим Абакарован гъилик чирна. Турнирра боксерди гьам Дагъустандин, гьамни Ростовдин областдин патай векилвал авуна.
Альберт Селимова спортдин рекье вичиз спонсорвилин куьмекар гайи «Нафта-Москва», «Рычал-су», «Теплосети Каспийска» карханаяр ва кьилдин ксар-карчияр рикIелай алудзавач, абуруз чухсагъул лугьузва.
Санлай къачурла, А. Селимова рингда 153 бягьс тухвана, абурукай 142-да гъалибвал къачуна. ИкI, мисал яз, 2007-йисуз Чикагода кьиле фейи дуьньядин чемпионатда 115 уьлкведай атанвай 639 боксерди иштиракна. Альберт Селимова чемпионатда 57 килограммдин заланвиляй 6 бягьс тухвана, сад-садан гуьгъуьналлаз США-дин, Румыниядин, Германиядин, Узбекистандин, Туьркиядин ва финалдани Украинадин боксеррин винел гъалибвал къачуна.
Спортдин рекье гъалибвилер, агалкьунар къазанмишунихъ галаз санал Альберт Селимова Дагъустандин госуниверситетдин социальный факультет ва Ростовдин правовой академияни акьалтIарна.
Хайи югъ ва юбилей мубарак авунихъ галаз санал чаз Альберт Шевкетовичахъ мягькем сагъламвал, хизанда хушбахтлувал, гьар са карда агалкьунар хьана кIанзава.
Хазран Кьасумов
