СтIал Сулейманан районда аялринни жаванрин спортдин 4 школа (ДЮСШ) кардик ква. Анра 2000-дав агакьна гадайрини рушари спортдин жуьрейрай вердишвилер къачузва ва чпин устадвал хкажзава. Хъсандиз кIвалахзавайбурукай, тербиячийрихъ спортда агалкьунар авайбурукай яз, чавай азаддаказ кьуршахар кьунай Эминхуьре кардик квай ДЮСШ-дин тIвар кьаз жеда.
– Чи спортшколадихъ ЦIийи Макьарал, Вини СтIалдал, Агъа СтIал-Къазмайрал, Зизика ва ЦIийихуьре филиалар ава, – лагьана чаз ДЮСШ-дин директор, Къазахстандин лайихлу тренер Абдулнасир Мегьамедкеримова.
Хъсанбурукай яз, директорди чаз Зизикрин филиалдин тIвар кьуна. Чун филиалдин тренер-муаллим Абдулагъа Мисрихановахъ галаз гуьруьшмиш хьана. Ада чаз лагьайвал, гьеле 1981-йисуз хуьре азаддиз кьуршахар кьунай Герейханован 1-нумрадин ДЮСШ-дин филиал ачухна. 2010-йисалай филиал Эминхуьруьн спортдин школадик ква. Ина сифтегьан вердишвилер къачур са шумуд касдикай, абурукай яз, алай вахтунда республикадилай къеце чпин спортдин рехъ давамарзавай Амир Пирмегьамедовакай, Владимир Гьуьсеналиевакай Россиядин спортдин мастервиле кандидатар, кесерлу турниррин гъалибчиярни призерар хьанва.
Алай вахтунда Абдулагъа Мисриханован гъилик Зизикай, Экендилай, НуьцIуьгъай къвезвай 40 жаванди азаддиз кьуршахар кьунай вердишвилер къачузва.
Районда, Кьиблепатан Дагъустанда ва республикада тухузвай акъажунра хъсан нетижаяр къалурзавай жаван спортсменрикай яз, Абдулагъа Мисриханова чаз СССР-дин Игит Абас Исрафилован турнирдин призер Ислам Алиметован, Анзор Яралиеван, Ибрагьим Алимирзоеван, Амир Алиметован, Ибрагьим Алхасован ва масабурун тIварар кьуна.
Жаван пагьливанрин устадвал хкажунин мураддалди Зизикрин хуьрени турнирар тешкилзава. ИкI, и йикъара филиалдин дестейрин арада тухвай акъажунра 25 касди иштиракна. Турнирдиз спонсорвал Авладин Тариева ва Мурад Алимирзоева авуна.
– Чи филиалдиз гьар са рекьяй, кьилди къачуртIа, турнирар тешкилунин, республикадин турнирриз спортсменар тухунин карда куьмекар гунай чна райондин кьиле авайбуруз, спорткомитетдин директор Чингиз Абдулмежидоваз ва спонсорриз чухсагъул лугьузва, – къейдна Абдулагъа Мисриханова.
Тренер-муаллим А. Мисрихановахъ кIвалахда ва адан тербиячийрихъ турнирра мадни еке агалкьунар хьун чи мурад я.
Чи мухбир
