Эхиримжи вад йисан вахтунда Дагъустанди къецепатан уьлквейриз маса ганвай метягьдин (экспорт) кьадар 2,9 сеферда гзаф хьанва. Идакай «Дагъустан Республикадин экспортдиз куьмек гунин центр» АНО-дин директор Руслан Абаскъулиева идаради алатай йисуз кьиле тухвай кIвалахдин нетижаяр кьадай пресс-конференциядал лагьана. Республикадин СМИ-рин векилрихъ галаз гуьруьш «Дагъустан» РИА-дин майдандал кьиле фена.
Малум хьайивал, 2025-йисуз Центради республикадиз къецепатан уьлквейрай амадагар желб авунин рекье активнидаказ кIвалахна. Шаз кIвалахдин рекьяй республикадиз Алжирдай ва Белоруссиядай делегацияр мугьман хьана. Идалайни гъейри, Дагъустандин карчийри Оман Султанатда бизнес-миссия кьиле тухвана.
Р. Абаскъулиева хабар гайивал, мукьвал вахтунда республикада гьазурзавай мижеяр Таиланддин базардани пайда жеда. И месэла саки гьялнава, амайди анжах сертификациядин серенжем кьилиз акъудун я. Республикадин суьрсет маса гунин кIвалах тешкилдайла, малум хьайивал, вилик акъваззавай виридалайни муракаб месэла логистика (ам чкадив агакьарунин рекьер) тешкилун я.
Идалайни гъейри, пресс-конференциядал Дагъустанда 50 гектардин мулкунал зейтундин багъ кутунин ва гьасилдай бегьер гьялдай цехар туькIуьрунин проектдикай рахана. Чна идалай виликни хабар гайивал, зейтундин багъ патал чилер Мегьарамдхуьруьн ва Дербент районрин мулкарал чара авунин месэладиз килигзава. И фикирдин тереф РД-дин Кьил С.Меликовани хвена. Ада къейд авурвал, республикада зейтундин ягъдин еке игьтияж ава. ИкI, багъ арадал гъунин гьакъиндай ISFA компаниядихъ галаз икьрардал къулар Санкт-Петербургда кьиле фейи экономикадин международный форумдал чIугунай.
Экспортдин центрадин директорди къейд авурвал, Дагъустандин мулкунал акъудзавай промышленностдин метягьдихъ къецепатан уьлквейра еке машгьурвал ава. И рекье чешне яз ада Узбекистандиз ва Азербайжандиз метягь маса гузвай «Салаватстекло Каспий» ва Азербайжандихъ галаз санал кIвалахзавай «Дагестан Стекло Тара» карханайрин тIварар кьуна. Идалайни гъейри, Узбекистандиз, Индиядиз, Белоруссиядиз ва Азербайжандиз Дагъустанда гьазурзавай сепараторарни маса гузва.
Дуьньяда арадал атанвай гьалар фикирда кьурла, алай вахт четинди ятIани, республикадихъ экспортдин сергьятар гегьеншардай, цIийи уьлквейрихъ галаз алишверишдин алакъаяр тайинардай фикир ава.
Саида Мурадова
