Дяведин махсус серенжемда Украинада кьил хкажнавай цIийи фашистрихъ галаз дирибашвилелди женгер чIугвазвай дагъустанвийрин викIегьвилерикай, игитвилерикай чаз гьар юкъуз ван жезва. Дяведин шартIарин вири четинвилериз дурум гуналди, абуру тапшуругъар кьегьалвилелди кьилиз акъудзава, душманар, абурун сенгерар кукIварзава, Донбассдин мулкар миллетбазрикай азадзава. Абурун жергейра Дербент райондин Агъа Жалгъан хуьряй тир подполковник, батальондин командир, Жуьрэтлувилин кьве ордендин сагьиб Фаик Меликовни ава. Адан уьмуьр женгерин юлдашризни, акьалтзавай несилдизни чешне я.
Фаик Меликова дяведин махсус серенжемдив эгечIай гьа сифте йикъарилай башчивилин, командирдин ерияр, душман терг авунин къаст, викIегьвал къалурзава. 2022-йисан июлдилай ада мотострелокрин 20-дивизиядин 3-батальондиз регьбервал гузва. Гвардиядин 58-армиядин командующийдин гъилик квай адан батальонди Запорожьедин терефда женгинин пара четин тапшуругъар кьилиз акъудзава. Гьар са женгина адан командирвилин алакьунар малум жезва. Ам гьамиша аскеррикай жезмай кьван хкатунар тежедайвал алахъзава. Гьужумдиз фидалди, тапшуругъ тамамардалди, гьар са улам ахтармишзава, ахпа кар кьилиз акъудзава.
2023-йисан июндилай Меликован батальонди Запорожьедин областдин стратегиядин метлеб авай Пятихатка ва Жеребянка хуьрер азад авунин къизгъин женгер тухвана. Душманди датIана акси гьужумар тешкилзавай, ракетайрай, дронрай батальондиз гзаф зиян гудай гьерекатар ийизвай. Амма абурун алахъунар вири бушбур хьана. Чи аскерри зиреквал, дирибашвал, дурумлувал къалурна.
КьетIен женгер 2023-йисан августдин вацра кьиле фена. Гьуьлуьн пияда кьушунрин 810-бригададин аскеррихъ галаз санал Меликован батальонди Работино ва Новопрокоповка хуьрер нацистрин гьужумрикай хвена. И хуьрерай чи аскерар чукурун ва сратегиядин метлеб авай даяхар кьун патал душман гзаф алахъна. Амма чи аскеррин жуьрэтлувили, командиррин пешекарвили, тамам ва дуьз гьерекатри миллетбазрин вири планар чIурна. Нетижада хуьрер азадна.
И операциядин вахтунда Фаик Меликован батальон кьетIендаказ тафаватлу хьана. Адан аскерар, мягькем руьгь, гьазурлухвал, зиреквал къалуруналди, маса батальонризни чешне хьана. Акьуллувилелди аскерар гьужумдиз тухвай дагъустанвидиз вахт жедалди подполковниквилин чин гана.
«Токмак – Мелитополь» рехъ душмандикай хуьнин тапшуругъни лап четиндаз элкъвена. Стратегиядин метлеб авай и рекьяй чи частар патал датIана яракьар, суьрсет дашмишзавай, аскерар тухузвай. Душманди, и рехъ чпин гуьзчивилик кутаз кIанз, гьужумар тешкилзавай, вири жуьредин яракьарни ишлемишзавай. Меликован батальонди тапшуругъ лап хъсандиз тамамарна. Ахпа маса частарихъ галаз санал Константиновка хуьр азад авунин женгинани иштиракна. Къалурай викIегьвиляй РФ-дин Президентдин Указдалди Фаик Меликоваз Жуьрэтлувилин кьвед лагьай орден гана.
Алай вахтунда подполковник Ф. Меликова СВО-да вичин къуллугъ давамарзава. Ада вичин тежриба, душмандихъ галаз женг чIугунин вердишвилер маса офицерриз, жегьил командирриз чирзава. Ватан кIан хьунин, адаз вафалувилелди къуллугъ авунин чешне къалурзава Меликова. Адан крарал, викIегьвилел анжах дамах ийиз жеда.
Дяведин махсус серенжемда авай хциз Акимхан бубадини куьмекзава. Ада вичин харжидихъ маса къачунвай «ГАЗ-53» авомашин гвардиядин мотострелковый 57-полкуниз рекье туна. Ам аскерар лазим чкайриз тухуз, хер хьанвайбур тади гьалда санчастариз агакьариз, вилик жергейра авай частариз суьрсет тухуз герек къвезва.
Дяведин серенжемда техникадикай гьикьван хийир аватIа, офицердин бубадиз хъсандиз чизва. Хци къуллугъзавай полкунихъ душман кукIварунин карда мадни хъсан агалкьунар хьун патал Акимхана къени, сувабдин кар авуна. Адаз, дяве фад куьтягь хьана, вичин хва ва гьакI амай военниярни кIвалериз сагъ-саламатдиз хтана, уьлкведилай миллетбазрин, коллективный западдин гьужумарни алатна кIанзава.
Абад Азадов
