Чпин бубайрин ери-бине Хив райондин Цналдилай тир, алай вахтунда азаддаказ кьуршахар кьунай машгьур спортсменрикай сад, Къазахстандин Актау шегьерда хана ва ана чIехи хьанвай Камиль Куругълиеван гъалибвилерикай чна мукьвал-мукьвал хабарар гузва. И йикъара Къазахстандин Тораз шегьерда 24 йисал къведалди яшда авай спортсменрин арада азаддаказ кьуршахар кьунай и республикадин кIвенкIвечивал патал кьиле фейи акъажунра К. Куругълиев 97 кг-дин заланвал авайбурун арада нубатдин сеферда 1-чкадиз лайихлу хьана.
РикIел хкин: Камиль ва Даурен Куругълиевар имидин рухваяр я. Алай вахтунда К. Куругълиева ДГУ-дин юридический факультетда кIелзава. Къазахстандин хкянавай командадик кваз кесерлу акъажунра са шумудра гъалибвилер къазанмишнавай, гьа гьисабдай яз 92 кг заланвал авайбурун арада дуьньядин (17 йисал къведалди яшда авайбурун арада) ва Азиядин чемпионвилин (21 йисал къведалди яшда авайбурун арада) тIварарин сагьиб тир адан мурад Олимпиададин къугъунра (ам Къазахстандин патай экъечIзава) иштиракун ва, гьелбетда, гъалибвал къазанмишун я. Мангистаудин областдин Олимпиададин резерв гьазурдай центрада вичин буба, Олимпиададин къугъунрин призёр Мегьамед Куругълиеван ва Роман Агьметханован гъилик устадвал хкажнавай чи ватанэгьлидихъ и жигьетдай вири мумкинвилер авазва.
Къазахстандин кIвенкIвечивал патал акъажунра чи миллетдин векилрикай, Мегьамед Куругълиеван ва Роман Агьметханован гъилик устадвал хкажнавай спортсменрикай мадни сада – Навруз Агьмедханова (86 кг-дин заланвал авайбурун арада) — гимишдин медаль къазанмишна. Алатай йисуз Къиргъизистандин Бишкекда 20 йисал къведалди яшда авай жегьилрин арада кьиле фейи Азиядин чемпионатда ам — 1, 2024-йисуз Къазахстандин чемпионатда 3-чкайриз лайихлу хьайидини рикIел хкиз кIанзава. Н. Агьмедхановакни тренерри еке умудар кутазва. Чи мурад жегьилрихъ гьам спортдин рекье, гьам кIелунра мадни чIехи агалкьунар хьун я.
Рагнеда Рамалданова
