Хуьруьн майишатдин хиле кадрияр бес тахьунин месэла Махачкъалада и мукьвара кьиле фейи конференциядал веревирд авур асул месэлайрикай сад хьана. Агрофирма «Согъратл» карханадин регьбер Абдурагьман Чураева къейд авурвал, государстводин патай куьмек авачиз, жегьилар малдарвилин хилез желб авун саки мумкин кар туш.
«Куьмек гунин махсус серенжемар кьабул тавунмаз, къенин юкъуз жегьилар хипехъанвилин хилез желб авун акьалтIай четин кар я», — гьисабзава ада. А. Чураеван гафаралди, кьиле А. Абдулмуслимов аваз, Дагъустандин Гьукумат са жерге артуханвилер ва кьезилвилер фикирда кьунвай кIватIал гьазурунин месэладив эгечIнава – ада Дагъустандин чубанрин дережа къунши уьлквейра абурун амадагар патал тешкилнавай шартIарив кьадайвал ийида. Месела, тIебиатдин кIеви шартIара зегьмет чIугвазвай чубанриз алава тир субсидияр ва кьезилвилер гузва.
Гуьзлемишзавайвал, малдарар патал кьабулзавай куьмекдин серенжемри неинки Дагъустан патал бинелуди ва адетдинди тир малдарвилин хел хуьдай, гьакIни ам цIийи несилдин пешекарар патал къешенгди, фикир желбдайди ийидай мумкинвал гуда.
Гьа са вахтунда къейд ийин хьи, республикадин малдарар патал дул къачунин къизгъин вахт алукьнава. И чIавуз абуруз ял ядай мумкинвал эсиллагь жезвач. Дагъустандин зегьметчияр патал чубанвал пеше ваъ, рикIин эвер гун яз гьисабзава.
И йикъара РД-дин хуьруьн майишатдин ва недай суьрсетдин министр Шамил Рамазанова ва министерстводин са жерге къуллугъчийри куьчери малдарвилин Кочубейдин зонада дул къачунин кампания кьиле физвай тегьер ахтармишна. Делегация са жерге карханайриз мугьман хьана, лапагрин суьруьяр авай гьал ахтармишна. ИкI, «Абдурагьманова Индира» ИП-да ири карч алай 106 ва куьлуь карч алай 1,7 агъзур гьайван ава. Къенин йикъалди майишатда 1,3 агъзурдалай гзаф гьайванрикай дул къачунва, гьа са вахтунда абурун саламатвал 99 процентдиз барабар я.
Ахтармишунин нетижаяр кьадайла, Ш. Рамазанова уьруьшар, чIурар авай гьалдилай ва алай йисан сезондин вахтунда Кочубейдин зонада арадал атай тIебиатдин къулай шартIарилай разивална. ИкI хьайила, хуьруьн майишатдин зегьметчийривай малар хъуьтIяй нетижалудаказ акъудиз ва дул сагъламдаказ къачуз жезва.
Саида Мурадова
