2035-йис алукьдалди Дагъустанди уьзумлухрин майданар тахминан 35 агъзур гектардив агакьдалди гегьеншарда. И мукьвара Дагъустанди Гьукуматди респубикада уьзуьмчивилин хел еримлу авуниз талукь яргъал йисарин стратегия веревирдна. Уьзуьмлухрин майданар гегьеншарунин рекье ийизвай кIвалахдикай совещанидал РД-дин уьзуьмчивилин ва ички квай шейэрин месэла гуьнгуьна тунин рекьяй Комитетдин председатель Шериф Керимханова хабар гана. Адан гафаралди, 2035-йис алукьдалди, регионда уьзуьмлухар кутунвай майданар 34,7 агъзур гектардив агакьдалди гегьеншарда. Абурукай 31 агъзур гектарда цанвай уьзуьмлухар активнидаказ бегьер гудай гьалда хьун лазим я.
Алай вахтунда республикада 24,1 агъзур гектардин уьзуьмлухри бегьер гузва. Вилик эцигнавай макьсаддив агакьарун патал кьетIен фикир дигидай цин месэладиз гузва: алай вахтунда 5 агъзур гектардин мулкара цIийи жуьредин стIал-стIал яд гудай къайда ишлемишзава.
Совещанидал къейд авурвал, уьзуьмчивилин хел вилик тухунин кардик йигинвал, санлай къачурла, 1,3 агъзур гектардин мулкара уьмуьрдиз кечирмишзавай чIехи кьуд инвестпроектди кутунва. Абуруз 1,42 миллиард манат серфнава. Карханайра 200-далай гзаф ксари йисан кьиляй-кьилиз кIвалахзава. ЦIийи мулкара уьзуьмлухар кутунин программадин са пай кьилиз акъуднава – 500 гектарда алай аямдин уьзуьмлухар кутунва. Важиблу проектрин арада ава: Къизлярдин коньякрин завод: Дербент (245,3 га) ва Къизляр районра уьзуьмлухрин участокар гегьеншарзава. «Каспийдин чIере»: Митагъи-Къазмайрин хуьре 150 гектардин чил гьялнава ва 150 агъзур кубометр яд хуьз жедай чка гьазурнава. «Дербент-Агро»: Жалгъан хуьре 106 гектарда уьзуьмлухар кутунва ва мад 50 гектар гатфарин кIвалахриз гьазурнава.
Саида Мурадова
