И йикъара Ленинградский областдин Колпино шегьер арадал атайдалай инихъ 296 йис тамам хьуниз талукь тир мярекатрин сергьятра аваз какахьай женгерай кьушунрин баркаллувилин шегьеррин Союздин Гран-При акъажунар кьиле фена.  

Акъажунра Россиядин 60 региондай 140-далайни гзаф къуватлу спортсменри иштиракна. Кьилди къачуртlа, тежрибалу пагьливанри заланвилин 8 дережадай Россиядин чемпиондин чlул патал бягьсер кьиле тухвана.

Турнир РФ-дин Милли Гвардиядин федеральный къуллугъдин кьушунрин ва Санкт-Петербургдин Колпинский райондин администрациядин, Колпино шегьердин ва Россиядин ММА-дин Союздин куьмекдалди кьиле фена.

Къейд ийин, какахьай женгерай Докъузпара райондин ДЮСШ-дин тренер, жуьреба-жуьре чемпионатра гъалибвилер къачунвай Артур Алискерова и турнирда Россиядин чемпионвилин чlул къачуна.

Артур Алискеров аял чlавалай спортдал машгъул я. Алай вахтунда адан «чантада» хейлин гъалибвилер ава. 2009-2010-йисара ам армейский жуьредин женгерай Дагъустандин хкягъай дестедик квай. Алатай йисара ам ЮФО-дин, СКФО-дин, Россиядин чемпионатрани гъалиб хьана. 2015-йисуз Молдавияда ММА-дай кьиле фейи акъажунра ада дуьньядин чемпионвилин тlвар къазанмишна. Алакьунар авай пагьливандихъ мадни агалкьунар хьурай!

«Лезги газет»